SENIOR CITIZEN HINULI SA PAGDADALA NG BARIL SA NAIA

ISANG 62-taong-gulang na pasahero na patungong Tagbilaran ang inaresto noong Martes ng hapon, Mayo 26, matapos matuklasan ng mga awtoridad sa paliparan ang isang walang lisensyang .45-caliber Colt pistol sa kanyang bagahe sa Ninoy Aquino International Airport (NAIA).

Ang baril, na may kargang magasin na naglalaman ng anim na bala, ay naharang sa Central Security Screening Checkpoint (CSSCP) ng mga tauhan ng Office for Transportation Security (OTS).

Sa manu-manong inspeksyon, nabigo ang suspek na magpakita ng anumang legal na dokumento o permit para sa armas. Agad siyang inaresto dahil sa paglabag sa Republic Act 10591, ang Comprehensive Firearms and Ammunition Regulation Act.

Kasunod ng medical examination at inquest proceedings, ang suspek ay inilagay sa ilalim ng kustodiya ng NAIA Police Station 2, habang hinihintay ang karagdagang legal na aksyon.

Binigyang-diin ng director ng PNP Aviation Security Group (AVSEGROUP) na si Police Brig. Gen. Dionisio Bartolome Jr. ang kanilang pagbabantay at pakikipagtulungan sa iba pang mga ahensya sa seguridad sa paliparan. (JOJO SADIWA)