KAPARTIDO NI ERICE MAY ‘WARRANT OF ARREST’ SA TAX EVASION!

PINAGHAHANAP ngayon si Konsehal Alexander Mangasar ng Caloocan City matapos lumabas ang warrant of arrest na inisyu ng Caloocan RTC Branch 126 para sa kasong ‘tax evasion’ na isinampa ng Bureau of Internal Revenue (BIR) at ng Department of Justice (DOJ).
Si Mangasar ay may pagkakautang sa BIR na nagkakahalaga ng kabuuang P8,385,754.94, na nahahati sa P6,969,750.82 na income tax at P1,416,004.12 na value added tax, kasama na ang penalty at interest, na hindi nabayaran ng kanyang kumpanyang Xander Marketing noong 2011.
Inilabas ni Acting Presiding Judge Misael Ladaga noong Lunes, Pebrero 8, 2021, ang warrant of arrest.
Itinaya ni Ladaga ang bailbond na P60,000 para sa ‘temporary liberty’ ni Mangasar.
Ang reklamong tax evasion ay isinampa nina revenue officers Marilyn Alonzo, Teresita Origen at John Daniel Cruz matapos paulit-ulit na hindi pansinin ni Mangasar ang kanilang demand na bayaran ang orihinal na mahigit P1.3 milyon na pagkakautang ng Xander Marketing sa BIR.
Si Mangasar ay sinampahan ng kasong paglabag sa Section 255, Chapter 2 ng National Internal Revenue Code of the Philippines (NIRC).
Unang inimbestigahan ang Xander Marketing noon pang 2013. Sa kabila ng paulit-ulit na demand ng BIR-Caloocan na kanyang bayaran ang pagkakautang ng kanyang kumpanya, hindi ito pinansin ni Mangasar.
Pormal na isinampa ng Caloocan City Prosecutor’s Office ang reklamo sa DOJ noong 2019.
Si Mangasar ay kilalang kaalyado sa politika ni Cong. Egay Erice mula sa ika-2 Distrito ng lungsod.
Hanggang sa ngayon ay hindi parin nagpapa-abot ng salita ukol sa asunto si Mangasar at kahit sa social media nito ay nananatiling tikom ang bibig nito.