Alex Eala sasabak sa Mubadala DC Open

MATAPOS ang matagumpay na season sa grass court na nagtapos sa makasaysayang pagtakbo sa Wimbledon, magpapahinga muna ng tatlong linggo ang Filipino tennis ace na si Alex Eala bago bumalik sa laro sa Mubadala DC Open na nakatakda mula Hulyo 27 hanggang Agosto 2.

Ang Mubadala ay isang 500-level na kaganapan na ginaganap sa Washington, D.C., Estados Unidos, kung saan sisimulan ni world No. 32 Eala ang kanyang North American hard-court swing na magtatapos sa huling major ng taon — ang US Open.

Kabilang sa mga sikat na manlalaro na kumpirmado sa main draw ng torneo sina world No. 8 Elina Svitolina, No. 13 Marta Kostyuk, No. 14 Naomi Osaka, at No. 16 Iva Jovic.

Pagkatapos ng Washington, inaasahan na ipapakita ni Eala ang kanyang laro sa National Bank Open sa Toronto na gaganapin mula Agosto 1 hanggang 13.

Katatapos lang ni Eala ng isang pangarap na takbo sa Wimbledon kung saan siya ang naging kauna-unahang Pilipinong singles player na nakarating sa ika-apat na round.

Tinalo ni Eala sina Mexican Renata Zarazua, Aussie Maya Joint, at ang defending champ na Polish na si Iga Swiatek bago siya talunin ng Italian na si Jasmine Paolini sa round of 16 noong nakaraang Lunes.