Direk Chaps Manansala, Emosyonal sa Pagpanaw ni Jobert Sucaldito: “Ang OOTD ang Buhay Niya”

Ni Mercy Lejarde

Sa programang OOTD (Oras ng Opinyon, Talakayan at Diskusyon) sa YouTube, ibinahagi ni Direktor Chaps Manansala ang kanyang mga saloobin at emosyon hinggil sa pagpanaw ng kanyang co-host at kaibigan na si Jobert Sucaldito

Ayon kay Direk Chaps, “Hindi ko alam kung paano ko uumpisahan ang programang ito. Nag-isip po kami nang maraming beses bago kami nagdesisyong mag-live. Sinabi pa sa amin ni Nanay (Jobert) na noong mga panahong hindi na maganda ang kanyang pakiramdam, sinabi ko sa kanya na magpahinga muna. Sabi ko, ‘Puwede kaming dalawa na lang muna ni May ang mag-live.’ Pero ang sagot niya, ‘Ang OOTD ang buhay ko.’ Hindi ko talaga alam kung paano ko uumpisahan ang lahat ng ito at kung paano ko ito tatapusin.”

“Ito pong OOTD—Oras ng Opinyon, Talakayan at Diskusyon—ang programang tatlong taong minahal at kinandili ni Nanay. Ito rin ang programang sinasabi niya sa akin na nagbigay sa kanya ng reaffirmation at nakatulong upang magbago ang pananaw ng maraming manonood tungkol sa kanyang tunay na pagkatao.

“Ito na po ata ang pinakamalungkot na episode na gagawin ko, at sana ay tulungan ako ng Panginoon. Hindi na magiging katulad ng dati ang OOTD dahil si Nanay Jobert ang tunay na bida ng programang ito. Ako, nasa gilid lang—pangpakalma at pambalanse lang sa kanya.

“Kaninang alas-10 ng umaga, nakauwi si Nanay sa bahay na kanyang tinutuluyan kasama si Nanay Jojit. Nasa ikalawang palapag siya, kung saan mayroon siyang sariling kuwarto.

“Ayon sa kuwento, bigla umanong nakarinig ng malakas na kalabog si Tata, isa sa kanyang mga kasama sa bahay, na noon ay nasa ikatlong palapag. Agad siyang bumaba sa ikalawang palapag at nadatnan si Nanay na nakadapa malapit sa pinto at may mga palatandaan pa umano ng buhay. Agad niyang tinawag ang kanyang asawang si Glen upang makahingi ng emergency assistance, at dali-dali nilang isinugod si Nanay sa Philippine Heart Center.

“Actually, pagdating ni Nanay sa Philippine Heart Center, wala na raw talaga siyang buhay. Tulog pa ako noong mga oras na iyon.

“Tumawag sa akin si Dominic Rea. Noong una ay hindi ko sinagot ang tawag dahil hindi ko inaasahang tatawag siya. Ngunit nang tumawag siyang muli, nakaramdam na ako na may nangyari. First time kasi niyang tumawag sa akin. Nang sagutin ko ang tawag, sinabi niya na nasa ospital na si Nanay.

“Sinubukan kong tawagan ang cellphone ni Nanay. Si Tata ang sumagot dahil siya ang gumagamit ng telepono ni Nanay. Tinanong niya ako kung ipapa-revive pa si Nanay. Agad kong sinabi, ‘Oo, i-revive ninyo siya,’ dahil iyon lang ang naisip kong dapat gawin. Sinubukan daw siyang i-revive at limang beses silang nagtangkang ibalik ang tibok ng puso niya. Ngunit ang totoo, dead on arrival na pala siya.

“Pagdating ko sa ospital, nakita ko si Nanay na nakahiga. May dugo ang bibig niya dahil tila nasubsob siya sa isang figurine nang siya ay madapa. Wala na siyang buhay nang makita ko siya.

“Noon ko sinabi sa sarili ko na sana ay hindi ko na lang nakita ang ganoong eksena. Ngunit ako ang pinakamalapit sa kanya, kaya ako rin ang nakakita sa kalagayan niya. Hanggang ngayon, hindi pa rin mabura sa isip ko ang itsura ni Nanay habang nakahiga sa kama sa Philippine Heart Center.

“Tapos dumating si Dominic, ang pamangkin ni Nanay. Sumunod naman ang kaisa-isa niyang anak, si Brian Carl.”

Sa nasabing programa, nagbalik-tanaw si Direk Chaps sa mga huling pangyayari bago pumanaw si Jobert.

Ayon kay Direk Chaps, “Noong huling episode namin, nagtaka ako kung bakit nakaputi si Nanay. Kinuha rin ng kapatid ko ang puti kong damit, kaya sinabi ko na lang, ‘Okay.’ Sabi ni Nanay, ‘Nak, pasensiyahan mo ako ha. Mukhang hindi ako magiging maayos dahil hindi maganda ang pakiramdam ko.’ Matapos ang live episode, nabiro ko pa siya at sinabi kong, ‘Sa lahat ng may sakit, ikaw ang pinakamatalino.'”

Ibinahagi rin ni Direk Chaps na matagal nang may iniindang karamdaman si Jobert. Naospital siya noong nakaraang buwan, at dahil dito, si Main ang nakasama ni Direk Chaps sa isang live episode upang maipagpatuloy ang programa para sa kanilang mga manonood.

Isinugod si Jobert sa Providence Hospital, kung saan isinailalim siya sa mga pagsusuri. Ayon sa mga doktor, mayroon siyang dalawang bara sa puso at may naipong tubig sa kanyang baga. Pinaniniwalaang ito rin ang dahilan kung bakit matagal nang namamaga ang kanyang mga paa.

Inirekomenda ng mga doktor na ilagay siya sa intensive care unit (ICU) dahil malubha na ang kanyang kondisyon. Gayunman, tumanggi si Jobert matapos niyang makita ang kalagayan sa ICU at malaman ang halaga ng gastusin.

Ayon kay Direk Chaps, sinabihan nila si Jobert na mayroon naman siyang ipon at handa rin siyang tulungan ng kanyang mga tunay na kaibigan at mga taong sumusuporta sa kanya. Ngunit likas umano kay Jobert ang hindi gustong maging pabigat sa iba. Dahil dito, pumirma siya ng waiver at tumangging ma-admit sa ICU, sa kabila ng mariing payo ng mga doktor.

Ayon pa kay Direk Chaps, sinabi ni Jobert, “Matagal na itong problema sa puso ko”

Dagdag pa ni Direk Chaps, habang hindi napipigilan ang kanyang pag-iyak, “Sino ba naman kami para sabihin na ‘hindi’ at ipilit ang gusto namin? Si Nanay ‘yan. Si Nanay Jobert Sucaldito ‘yan—matapang ‘yan.”
Kahit labag sa kanilang kalooban, iginagalang nila ang naging pasya ni Jobert. “Sabi niya, ‘Nak, sa regular room na lang ako.’ Sabi ko, ‘Nay, sige, basta nasa ospital ka. At least, anumang oras na may mangyari, nandiyan ka na.'”

Upang pagaanin ang sitwasyon, nagbiro pa umano sila ni Main, “Sabi namin, ‘Nay, ito ang paboritong ospital ni Kris Aquino.’ Natawa pa siya at sinabi, ‘Hindi pa talaga ako laos.'”

Gayunman, makalipas lamang ang dalawang gabi, nainip na umano si Jobert at muling kinausap ang nurse upang ipaalam na nais na niyang makalabas ng ospital.

Ani Direk Chaps, “Gusto ko siyang pigilan. Gusto kong magalit. Gusto kong taasan ang boses ko. Pero anong magagawa ko? Gusto na niyang umuwi.”

Muli umanong pumirma si Jobert ng waiver upang makalabas ng ospital. “Habang nakikita ko siyang pumipirma ng waiver, alam ko na. Pinapakita niyang parang wala siyang nararamdaman sa amin. Parang nagpapaka-best actress siya.”

Ikinuwento rin ni Direk Chaps na ilang araw bago ang pagpanaw ni Jobert, sinabi nitong nagtungo siya sa Philippine Heart Center upang isumite ang mga resulta ng kanyang mga pagsusuri mula sa Providence Hospital. Ayon kay Jobert, sinabi sa kanya na aabutin pa ng isang buwan bago lumabas ang mga resulta.

Dagdag pa ni Direk Chaps, matagal nang nakararanas si Jobert ng matinding anxiety at hirap sa pagtulog. Aniya,”Ilang buwan na siyang halos isang oras lang ang tulog bawat araw, pero hindi niya ipinapahalata sa inyo. Ang OOTD ang naging buhay ni Nanay. Lagi niyang sinasabi sa akin na kayo—ang mga hindi bumitaw sa kanya at ang kanyang mga kaibigan—ang nagpalakas sa kanya.”

Isang araw, sinabi umano ni Jobert na maayos na ang kanyang pakiramdam. Ayon kay Direk Chaps, doon lamang niya unang napataas ang kanyang boses kay Jobert.

Aniya, “Sabi niya, ‘Nak, okay na ako.’ Sabi ko, ‘Ikaw, okay ka. Pero paano naman kami?’ Sinasabi niya kasi na mahal ang gastusin. Sinabi ko sa kanya, ‘May pera ka. Maraming nagmamahal sa’yo. Huwag mong sabihin sa akin na pera ang problema, dahil alam kong hindi iyon ang tunay na dahilan. Ayaw mo lang talagang maging pabigat.'”

Matapos ang kanilang paguusap ay nanahimik na lang daw si Jobert.

Sa bandang alas-10:30 ng umaga noong Agosto 2, kinumpirma ang pagpanaw ng aming mahal na kaibigan na si Jobert Sucaldito.

Sobrang lungkot ang naramdaman ko sa mga sandaling iyon. Nagpapasalamat ako sa Panginoon dahil bago pumanaw si Jobert, nagkaroon pa kami ng pagkakataong magkita sa concert na ginawa ni Daisy Romualdez.

Buti na lamang at hindi ako naniwala sa sinabi ng isang reporter na kung anu-ano ang ibinahagi upang pigilan akong pumunta. Salamat, Panginoon, at hindi ako nagpadala sa sinabi ng taong iyon. Nagkaroon pa kami ng pagkakataong magkatabi at sabay na kumain noong mga oras na iyon.

We love you, Jobert. God bless you, and may you rest in peace.

Maraming salamat, Direk Chaps, sa pagmamahal at pag-aalaga mo sa ating kaibigan.