Duterte inaprubahan na ang implementasyon ng Pantawid Pasada

APRUBADO na ni Pangulong Rodrigo Duterte ang rekomendasyon ng Department of Energy (DOE) na ipatupad ang P2.5 bilyong Pantawid Pasada Program.

Ito ay para maayudahan ang mga tsuper sa mga pampublikong sasakyan sa gitna ng patuloy na pagtaas ng presyo ng produktong petrolyo dahil sa tensyon sa pagitan ng Ukraine at Russia.

Sinabi ni Cabinet Secretary at acting presidential spokesman Karlo Nograles, inaprubahan din ng Pangulo ang P500 milyong fuel discount program para sa mga magsasaka at mga mangingisda.

“On the supply of oil, the President approved the recommendations of the Department of Energy (DOE) to implement the P2.5-B Pantawid Pasada, and P500-M fuel discount program for farmers and fisherfolks,” pahayag ni Nograles.

Ayon kay Nograles, patuloy na magbabantay ang DOE para tiyaking sapat ang suplay ng produktong petrolyo sa bansa.

Hinihimok din ng Palasyo ang Kongreso na rebyuhin ang Oil Deregulation Law.

Para sa medium-term measures, dapat din aniyang mayroong strategic petroleum reserve infrastructure, Minimum Inventory Requirements (MIR) at isulong ang energy conservation at efficiency. (Vanz Fernandez)