BANTAG, 7 PA SINAMPAHAN NA NG PLUNDER SA DOJ

SINAMPAHAN na ng reklamong ‘Plunder’, ‘Malversation of public funds’, katiwalian at paglabag sa ‘code of conduct’ si dating Bureau of Corrections (BuCor) Director General Gerald Bantag at pitong iba pa.

Kaugnay ito sa P900 milyong halaga na mga proyektong pagtatayo ng pasilidad sa Davao, Palawan at Leyte.

Sa inihaing reklamo, pineke umano ang ‘accomplishment report’ kungsaan sa Palawan ay 93% na ang bayad pero 57% palang tapos, habang sa Davao 95% nang bayad pero 59% pa lamang ang nagagawa, at sa Leyte 80% nang binayaran ng gobyerno ngunit 47% pa lamang ang naitatayo.

Pinangunahan ni BuCor Officer-in-Charge Gregorio Catapang ang paghahain ng reklamo sa Department of Justice (DOJ) laban kay Bantag, Corrections Technical Supt. Arnold Guzman at anim na tauhan ng BuCor.

Sinabi ni Atty. Al Perera, legal counsel ng BuCor, na may hiwalay na reklamo pa silang ihahain laban sa mga kasapi ng isa pang Bids and Awards Committee na binuo ni Bantag na labag sa mga patakaran.

Ito ang ikaapat na reklamong isinampa ng BuCor laban kay Bantag.