RELIGIOUS GATHERINGS, SINEHAN OK NA!

APRUBADO na ng Inter-Agency Task Force (IATF) ang mga religious gatherings sa mga lugar na nasa ilalim ng general community quarantine (GCQ) kung saan mula sa kasalukuyang 30 percent, papayagan na ang 50 percent seating capacity simula sa Pebrero 15.
Ayon kay Presidential Spokesman Harry Roque, inaprubahan ito ng IATF sa ginanap na pulong nitong Huwebes, Pebrero 11.
Sinabi pa ni Roque, inaprubahan na rin ng IATF ang reopening at expansion ng operasyon ng ilang negosyo at industriya gaya ng driving schools; traditional cinemas at video and interactive-game arcades; libraries, archives, museums at cultural centers; meetings, incentives, conferences and exhibitions at limited social events sa mga accredited establishments ng Department of Tourism (DOT).
Maging ang reopening ng mga limited tourist attractions gaya ng parks, theme parks, natural sites at historical landmarks.
Pahayag ni Roque, ang reopening at expansion ay subject sa implementing guidelines para sa operational capacity at oversight ng kinauukulang regulatory agency at concerned local government units (LGUs) kung saan nakabase ang mga negosyo at industriya.
Dapat din aniyang sumunod ang mga nasabing negosyo at industriya sa minimum public health standards na itinakda ng Department of Health (DOH).
Maliban sa Metro Manila, kabilang din sa nasa ilalim ng GCQ sa buwan ng Pebrero ay ang Cordillera Administrative Region (CAR), Batangas, Tacloban City, Davao City, Davao del Norte, Lanao del Sur at Iligan City. (Vanz Fernandez)