NALIMOT NA

Minsang dumadaan sa buhay ang mga bagay na kailangang palagpasin, subalit ‘di mabilis na malimutan dahil mahalagang bahagi ito ng buhay. Sa paglimot masasabing may tatamaan dahil maselan ang kalagayan at tunay na nakakahawa ang dalang karamdaman, ang magkaroon ng C19. Nilimot ni Boy Pektus ang sakit na halos kumitil sa buhay at salamat sa siyensiya’t dami ng pera na nalunasan ang sakit na dumapo. Sa pagbabalik sigla ng katawan nabiyayaan pa ng pwestong asam na sana ay ginagamit upang unahin ang usaping kalusugan. Subalit ‘di ginawang tuntungan ang karanasan sa halip tila napabayaan ang programang pangkalusugan sa pagtuon sa bagsak na kabuhayan na iniwan ng pinalitang pamahalaan.

Ang paglatag ng programang sa C19’y tila naunsiyame at heto’t muling nagbabalik ng dahan dahan sa ilang lugar sa kaMaynilaan. Muling bumabangon ang C19, ang masaklap ‘di na pansin ng pambansang pamahalaan sa ngalan ng pagpapalakas ng ekonomiya ng bansa. May ilang LGU na nakatutok sa usapin sa antas ng nasasakupan ngunit hanggang sa pagpapaalala ng pagsusuot ng face mask at social distancing ang nagging hakbang ng makaiwas sa sakit na C19. Ang mahirap sa kalagayan sa ngayon, walang susog mula sa pamahalaang Pambansa ang ginagawa ng LGU. Resulta, tila kumpiyansa ang mga Pinoy sa nakuhang mga bakuna ay nalimot ang bagsik ng C19. Marami sa Pinoy ang hindi nagsusuot ng facemask at kung makipaghalo sa kapwa’y tila ‘di na dumaan ang C19. O’ sadyang sumusunod sa ibig ng pambansang pamahalaan na kontrolado na ang C19 sa bansa higit sa kaMaynilaan. Ano masasabi ni Mayor Doc.

Ngunit sa isip lang kontrolado ang pandemya dahil muli dumadami ang bilang ng nagkakaroon. Ang masakit hindi ito nabibigyan pansin ng media maging ng mga research organization sa ngalan ng pagpapalakas sa kabuhayan ng bansa. Maging ang mga research organization tulad ng Philippine Genome Center ay tila nauumay sa pag-aaral ng C19 sa kawalan ng interes ng mga funding agency at ng pamahalaan ni Boy Pektus. Sa totoo lang, malakas ang uri ng C19 variant na tumatama sa marami-rami nating kababayan at ikinasawi nito. At wala o kulang ang pag-aaral ng PGC sa ‘di malamang dahilan. Habang sa antas ng mga doctor, hindi maipaliwanag kung anong uri ng virus ang tumatama sa mga pasyente. At iisa ang sigurado, malakas ang bagong variant. Maging ang DOH ay ‘di alang magawa sa muling pagdami ng C19 kahit may bakuna na ang marami sa mga Pinoy.

Sa kawalan ng aksyon ng DOH o tali ang kamay ng OIC at ‘di makakilos ng sapat at kailangan ng clearance mula sa Pangulo upang makapagpalabas ng pondong magagamit laban sa COVID. O’ abala ang opisina ni Boy Pektus sa pag-aaral na kung paano nakapaloob ang PHILHEALTH sa Office of the President ng magkaroon ito ng access sa bilyong pondong tangan. Ang kilos bang ito’y paglimot sa nakaraang karanasan o pagbawi sa gastos ng nakaraang halalan. O’ sadyang nababagalan sa pagbuo ng Maharlika Investment Fund Corp. na umaani ng batikos sa maraming sektor ng lipunan. Ngunit sa nakalipas na araw, naglabas si Boy Pektus ng kautusan sa Kongreso na unahin ang batas sa pagbuo ng MIV Corp., na basang basa ng kahit isang grade 6 na ibig magkaroon ng pera sa madaling panahon. Para saan at para kanino? Di pa ba sapat ang perang tangan at ang ‘di binabayarang estate taxes sa pamahalaan, tanong lang po?

Sa totoo pa more, nakakabahala ang muling pag-taas ng bilang ng nagkaka C19 at malakas ang variant na mabilis na kumikitil sa buhay ng nagkakaroon. Ang pagwawalang bahala ng pamahalaa’y ang mas nakakabahala lalo pa wala na ang bisa ng mga bakunang unang ibinigay. Walang hindi pinipili ang bagong variant kahit anong edad higit ang mga ‘di nabakunahan at walang booster. Masasabing maliit pa ang bilang ng nagkakaroon ng C19 sa dami ng Pinoy, ‘di kailangan hintayin ang pagdami. Ang ”pro-active” na kilos ang inaasahan sa pamahalaan higit sa Pangulo na batid ang bagsik ng virus at kung gaano kaseryoso ang sakit na binabangit. Boy Pektus ang karanasan ang gawing batayan sa kilos na kailangan upang maisalba ang buhay na dapat maisalba higit sa mga kapos sa serbisyo ng pamahalaan. Ang pagkilos sa usaping kalusugan ay kasing halaga ng sa pangkabuhayan. “Di ba Health is Wealth.”

Sa pagmamasid, ang ‘di makapagtalaga ng Kalihim sa DOH ang naglalarawan na ‘di pangunahin ang usapin ng kalusugan sa pamahalaan. Isang taon na ang lumipas wala pa ring Kalihim ang kagawaran na siyang tututok sa programang pangkalusugan ni Boy Pektus. Dahil sa ‘di ma-italaga bilang Kalihim ang OIC ng kagawaran kahit maganda ang ginagawang pagtitimon sa kagawaran. Ito’y malinaw na kilos politika ni Boy Pektus upang mapagbigyan o’ bayad sa ilang malapit na taga suporta. Ang paghihintay ng isang taon ay sapat nang masasabing bayad pulitika ang pwesto ng kalihim. Balitang tatlo ang pinagpipilian, hintayin? Ang masaklap, tila nasa kabilang bakod ng politika si OIC at ang ‘di pagtatalaga may mga dapat na ‘di kayang gawin. Kasama ba dito ang paglilipat ng PhilHealth sa OP?

Sa pagtatalaga ng magiging Kalihim ng DOH, unahin ang kagalingan panlipunan higit ang kalusugan ng mamamayan. Walang lugar sa kagawaran ang politika dahil kalusugan at buhay ng mamamayan ang nakasalang sa gagawing pagtatalaga. Mahaba na ang pagtitiis ng bayan mula ng pumasok ang C19 at ang tamang kalihim ang inaasahan. Kalihim na uunahin ang usaping kalusugan at hindi ang paglipat ng PHILHEALTH sa opisina ni Boy Pektus. Unahin ang mga hakbang na nagpapawala sa C19, at limutin ang paglipat ng opisinang maaaring pagatasan sa maraming dahilan. Minsan nang pumasok ang Malasakit Program na ginawang tuntungan sa naunsyaming pangarap ng isang gaGo. At heto na naman. Kawawa ka bayan, dahil una ang interes at ‘di ang pangkalusugan.

Boy Pektus, ang karanasan sa pagkakaroon ng C19, ang tamang batayan na ‘di biro ang humarap sa usaping pangkalusugan lalo’t buhay ang nakasalang. Ang ibinigay ng ikalawang pagkakataon sa buhay’ huwag limutin sa halip ay pagyamanin. Limutin ang pagkakaperahan at unahin ang kalusugang pambayan.

Maraming Salamat po!!!