PAGGAMIT NG ‘YAMANG TUBIG’ IPINAGKALOOB NG BUCOR SA PUERTO PRINCESANS

NAGPAHAYAG ng pasasalamat ang Sangguniang Panlungsod ng Puerto Princesa City kay Bureau of Corrections Director General Gregorio Pio P. Catapang Jr., sa pagpayag sa Puerto Princesa City Water District ( PPCWD) na gamitin ang Sta. Lucia River, Inagawan River at iba pang pinagkukunan ng tubig sa ilalim ng hurisdiksyon ng bureau para sa paggamit ng mga Puerto Princesan.

Sa isang resolusyon no. 605-2023, ang City Council ng Puerto Princesa ay nagpahayag na ang BuCor , sa pamamagitan ng Iwahig Prison and Penal Farm ay namamahala at nag-ooperate ng Sta. Lucia River, Inagawan River at iba pang pinagkukunan ng tubig sa Puerto Princesa City.

Nakasaad din sa resolusyon na sa pamamagitan ng pamumuno ni Director General Catapang ay ipinagkaloob ng walang pag-aalinlangan ang kahilingan ng Puerto Princesa City Water District (PPCWD) para sa paggamit ng mga yamang tubig nito para sa patuloy na pagtamasa ng mga residente sa paggamit ng ligtas na suplay ng tubig.

Sa pagkilala sa kabaitan ng Catapang ay itinuturing ng ‘August Body’ na nararapat na ipatupad ang panukalang ito at nagkakaisang inaprubahan ang mosyon na inihain ni Hon. Modesto V. Rodriguez II, City Councilor, Majority Floor Leader upang ipahayag ang kanilang pasasalamat kay Catapang.

Si Catapang sa kanyang bahagi ay nagpasalamat sa Sanguniang Panlunsod ng Lungsod ng Puerto Princesa at sa buong local government unit sa pangunguna ng Mayor nitong si Lucilo Bayron at City Vice Mayor Maria Nancy Socrates na siya ring presiding officer sa City Council.

Sinabi ni Catapang na makatitiyak na ang BuCor ay laging bukas para tumulong at makipagtulungan sa anumang kapasidad na itinuturing na kinakailangan partikular sa mga lugar kung saan matatagpuan ang ating mga kulungan at penal farms. (JOJO SADIWA)