RESBAK NG ICC

KUMARIPAS ng takbo na dinaig ang bullet train sa bilis ang dating palamurang pangulo, mayor, congressman ng mabatid na maglalabas ang International Criminal Court o ICC na may dahilan ipagpatuloy ang imbestigasyon sa mga karumal dumal na krimen na naganap sa bansa noong panahon ito’y pangulo. Sa pagkaripas, tumuloy at agad na nagsumbong sa among si Onse (XI) na akala mo’y gagawa ng paraan sa usaping kinakaharap ng alaga hinggil sa maling laban sa droga. Sa dami ng inosenteng tao ang nabiktima ng laban na sa droga na hindi napagwagian sa halip pinagkakaperahan ng nasa pamahalaan ng ito ang lider ng bansa. Hindi maikakaila na maraming droga ang dumaan at lumusot sa mga Aduana sa bansa. At isa dito ang natagpuan sa isang bodega na ikinalungkot ng marami na ang bantay ng bodega ang nahatulan ng hukuman ng habang buhay na pagkabilanggo. Habang ang mga utak at kapitalista’y nahalal sa kongreso at naghihintay ng tamang panahon na makabalik sa poder ang kasangga sa puno ng Balite sa Malacanan.

Tulad ng bodegero na biktima ng kawalang alam, maraming kaluluwa ang naglipana sa paligid nagagalak sa balita hinggil sa ICC na may nakikitang dahilan na ipagpatuloy ang pag-usisa sa krimen na kinasasangkutan ni Totoy Kulambo, Tobats at marami pang iba dahil sa programang laban sa droga. Ang naglipana kaluluwa’y tila tumataghoy na naghahanap ng katarungan na ‘di nakamtan sa lipunang ginagalawan dahil sa batid na kadahilanan. Sa pagresbak ng ICC ang taghoy ng mga kaluluwa’y tila lumakas at nagkaka boses sa pamamagitan ng mga mahal nito sa buhay. Ang isa dito’y ang ina ni Aldrin Castillo na si Nanette na idinulog ang usapin ng anak na biktima ng summary execution, salvage o Extra Judicial Killing ng laban sa droga noong nakaraang administrasyon sa isang sangay ng Human Commission sa Geneva, Switzerland.

Sa pag-uusisa sa nangyari sa biktimang si Aldrin Castillo o AC, napag-alaman na isang gabi sa lugar na kinalakihan, lumabas ito ng bahay upang magpahangin. Sa kasamaang palad may nagaganap na operasyon ang mga pulis ng MPD sa mga tulak ng droga at ng makita ang biktimang si AC’y tinanong ang ngalan ngunit walang naganap na hulihan at kagyat na pinutukan sa ulo’t sa dibdib ang walang kaalam alam na biktima. Ang putok, sigawan at kutob ang nagpatakbo sa ina na silipin ang nangyayari. Tumambad ang walang malay na katawan ng anak na naliligo sa sariling dugo. Sa totoo lang, ayaw palapitan ng mga MPD operatives ang nakahandusay na katawan ng biktima ngunit hindi maawat ang ina na yakapin walang buhay at duguang katawan ng anak na biktima ng programa laban sa droga.

Masakit ang kinasapitan ni AC na inihahanda ang sarili upang makapag hanap buhay sa ibang bansa sa layon na maibangon ang kabuhayan ng pamilya. Ang isang saglit na pagkakamali ng mga pulis ang pasan ng pamilya sa kasalukuyan dahil sa pagkawala ng inosenteng nilalang. Si AC’y isang magaling na manghihinang na kasa-kasama ng ama sa trabaho at katuwang sa mga bayarin sa bahay. Ito’y naghahanda patungo sa ibang bansa bilang OFW. Ang pagnanais na maiahon ang pamilya sa kahirapan, kabaligtaran ang nangyari at nawalan ng anak na inaasahan sa kinabukasan. Mabigat ang nangyari higit sa pamilya ng inosenteng biktima na ang pagkakamali’y naroon sa ‘di tamang lugar at oras. Sa totoo pa rin, patuloy na nag-usisa ang MPD sa pamilya ni AC at ng mabatid na isang “mistaken identity” ang nangyari, ang ipinaabot na mensahe ng pagtutuwid sa kaganapan. Tinayuan na lang ang nangyari ng ‘di masabing may pagkakamali. Ang hirap nito, isang inosenteng biktima ang kapalit ng pagkakamali. At walang sorry.

Sa totoo, hindi tutol ang Batingaw sa programang laban sa droga dahil ito’y salot higit sa mga kabataan. Sinisira nito ang kinabukasan inaalisan ng kabuhayan maging ang pamilya’y nasisira ng mga taong lulong sa iligal na droga. Ang hindi sinasang-ayunan sa programa’y ang paraan ng paglaban na inaalis ang Karapatan ng sinumang tao na pinaghihinalaang gumagamit o nagtutulak. Walang proseso dinadaanan at kagyat na inaalisan ng buhay sa halip na hulihin, ikulong o i-rehab. Ang pinaikling proseso ng paglaban gamit ang EJK na walang tanong at magtatanong ang inaayawan. Ang masakit, ang buhay ng mga nawala higit ng mga inosente na naroon sa maling lugar at oras ng krimen o operasyon ng operatiba ng pamahalaan. Tama ang laban sa droga kung binigyan pansin na ang mga gumagamit nito’y biktima rin ng sitwasyon ‘di ibig. At ang hiling, pairalin ang haligi ng hustisya at hindi ang nais ng namumuno sa pamahalaan.

Ang pagiging brusko’t pagkahilig sa “shortcut” at ang kaalaman sa batas ni Totoy Kulambo, ang paraan na ito ang pinagawa sa mga tauhan higit sa tuwirang nag-uulat dito ng walang singaw na maamoy. Ang tagumpayan ng programa halos nasa kamay na ngunit tunay na may gumagalaw para sa totoong hustisya. Ang kawalan ng prosesong inilatag laban sa droga at tila hinikayat ang kapulisan na ibigay ang hustisya sa dulo ng baril ang sisilipin sa resbak ng ICC. At ang dahilan ng pamilya ng mga biktima na nagpalakas ng taghoy na dahilan ng resbak ng ICC.

Sa pagbalik tanaw sa mga bangit ni Totoy Kulambo sa nakaraan na sagot niya ang sasama sa programa laban sa droga. At ang taghoy ng mga biktima ng EJK higit ng mga inang lumuluha na naghahanap ng katarungan, ang nagtulak sa ICC na ituloy ang pag-usig laban kay Totoy Kulambo at mga kasama. Sa nabatid na kautusan ng ICC, nagkukumahog si Totoy Kulambo at nagtungo sa bansa ng among ‘di maasahan. Ang pagbabalik ng ICC’y hudyat na may nakitang paglabag sa batas ng Karapatan Pantao ang dating pamahalaan na dapat panagutan. Ang magandang layunin na linisin ang bayan kontra droga’y tila bangag dahil sa kapangyarihang nahawakan na akala’y walang hanganan. Tunay na halos abot kamay na ang hustisya na hanap ni Nanay Nette sa anak na si AC at sa maraming biktima ng EJK.

Maraming Salamat po!!!