Pari arestado sa granada at baril

ARESTADO ang isang pari nang makuhanan ng granada at baril sa isinagawang search operation ng mga miyembro ng Compostela PNP noong Huwebes ng umaga sa Purok-2, Barangay Poblacion Compostela, Davao de Oro.

Kinilala ang naaresto na si Fr. Sotero Verzano Fennis Jr., 42 anyos, may asawa, kura paroko ng Filipino Catholic o ‘Filipinista Church.

Nakuha sa posisyon ni Fennis ang isang fragmentaion grenade, dalawang .45 Colt caliber pistol, .45 caliber pistol magazine, isang M4 Rifle upper reciever, M4 rifle accessories, 2 cellophane na naglalaman ng pistol spare parts, 1 caliber 22 rifle, 54 assorted caliber 45 pistol spare parts at 1 box na naglalaman ng 13 fired cartridge case ng kalibre 45.

Nabatid na ang pari ay Top 9 sa listahan ng Regional Level Priority Targets at kasalukuyang mahaharap sa kasong paglabag sa Comprehensive Firearms and Ammunition Regulation Act at Illegal Possession of Explosives.