P178m bulok na karne, isda narekober sa MICP

Tinatayang P178 milyong halaga ng kontaminadong frozen meat at isda ang narekober ng Bureau of Customs (BOC) mula sa 22 abandonadong container sa Manila International Container Port.
Pinangunahan ni Customs Commissioner Ariel F. Nepomuceno ang inspeksyon habang kinumpirma ng Customs Intelligence and Investigation Service ang sirang cold chain na nagdulot ng pagkatunaw ng mga produkto.
Naglabas ng Notices of Violation ang Bureau of Animal Industry at Bureau of Fisheries and Aquatic Resources laban sa importer dahil sa paglabag sa Food Safety Act.
Isasailalim sa disposal ang mga shipment na may kabuuang mahigit 576,000 kilo at idineklarang abandonado alinsunod sa Customs Modernization and Tariff Act.
Mula 2025, nakapagsampa na ang BOC ng 72 kaso sa Department of Justice kaugnay ng smuggling ng agricultural products. (Jocelyn Domenden)