Mga palusot ni Chiz sa ‘di pagkilos sa impeachment case vs VP Sara

NASAGAWA nitong Lunes, June 9, ng press conference si Senate President Chiz Escudero matapos niyang i-reset ng dalawang beses ang pagtalakay sa impeachment case laban kay Vice President Sara Duterte na iniakyat ng Kamara sa Senado noon pang Disyembre 2024.

Ginawa ni Escudero ang press conference siguro dahil sa nakikita niyang patindi nang patindi na ang panawagan ng taumbayan na simulan na ang impeachment trial “forthwith” bago pa matapos ang 19th Congress sa katapusan ng buwan.

Maging sa survey ay 84 percent ng mga Filipino ang nagnanais na marinig ang paglilitis ng Senate Impeachment Court sa mga reklamo laban sa pangalawang pangulo.

Narito ang mga rason o palusot ni Escudero sa ‘di pag-aksyon sa naturang impeachment case na mag-anim na buwan nang tinutulugan ng Senado:

• Wala pang pormal na inihaing resolusyon para ibasura ang impeachment case laban kay Vice Pres. Sara Duterte.
• Ang gusto nila madaliin namin ‘yung aming constitutional duty. Gagampanan namin ‘yun pero hindi sa oras na gusto nila porket nagmamadali sila.
• Ang paniniwala ko at ang tingin ko, tatawid ito sa [20th Congress]. Pero itong opiniyong ‘to mula sa 19th Congress ay hindi puwedeng i-bind ang 20th Congress. Kailangang pagpasyahan muli ‘yan.
• Sa schedule ni Sen. Francis Tolentino na pwedeng matapos in 19 days ang impeachment trial, sinabi niyang: ‘Yan ay isang paksang dapat pagpasyahan ng impeachment court.
• Iginagalang aniya ang mga nadidismaya sa kawalan ng garantiya na magco-convene ang Senado bilang impeachement court: Hindi porket gigil na gigil sila ay susunod kami bagaman labag hindi lamang sa Konstitusyon at batas pero sa pagpapasya ng Senado.
• Wala aniyang intensyon sa ngayon na patayin ang articles of impeachment bago pa man ang paglilitis. Kung meron man, pagbobotohan aniya ito.
• Hindi aniya gusto si VP Sara [Duterte] “pero hindi rin ako galit sa kanya. I am performing and doing my role the best way I see fit without any fear or bias.”