Sarah Lahbati idinawit sa hiwalayan nina Ellen Adarna at Derek Ramsay

Itinanggi ni Ellen Adarna ang isyung may kinalaman umano si Sarah Lahbati sa hiwalayan nila ng mister na si Derek Ramsay.

Ang isyu ay nag-ugat matapos banggitin ng showbiz reporter at talent manager na si Ogie Diaz sa kanyang YouTube vlog noong Oktubre 24 na si Sarah daw ang nag-udyok kay Ellen na bumili ng mamahaling bahay na hindi raw inaprubahan ni Derek.

Ayon kay Ogie, “Parang nag-aahente raw si Sarah kay Ellen para bilhin ang bahay.” Ipinunto pa niya na tila ito ang ugat ng hindi pagkakaunawaan ng mag-asawa.

Ngunit agad itong sinagot ni Ellen sa kanyang Instagram Story, sabay post ng usapan nila ni Sarah: “Ako raw reason ng breakup niyo? WTF!” ani Sarah. Sagot ni Ellen, “Since when were you a house agent? LOL! I can’t with these people!”

Dagdag pa ni Ellen, “Mama Ogie, klaruhin natin ha—pag sure sa imong source! Kung gusto kong bumili ng bahay, kaya kong bilhin mag-isa. At si Sarah, hindi house agent!”

Matatandaang kamakailan ay lalong umigting ang tsismis na totoong hiwalay na ang mag-asawa matapos na hindi dumalo ang aktor sa first birthday ng anak nilang si Lily.