PALPAK ANG PAGKILOS

Tadhana ang nagtatakda sa kapalaran ng tao sa mundong ginagalawan. Maisasagawa ang galawang ibig higit may pagsang-ayon ang kasapian higit kung mataas ang paniniwala sa pamunuang kinasasapian. Ngunit ‘di ganap na mapagtatagumpayan ang ibig na pagbabago ayon sa nais higit ang kasalukuyan na ‘di ibig ng nakakarami na nakakatanaw ng pag-asa sa kinabukasan sa pamunuan na ‘di man ganap ang kagalingan ngunit nakikitaan ng liwanag sa nais tahaking pagbabago. Ang galawang may pagsang-ayon ang sanlumikha ay ‘di naisusulong ng walang dahas at nagaganap sa takdang panahon na ibig. Huwag iwalay sa isip at puso, ang nais ng nasa itaas ang kaganapang ‘di maiiwasan maging sinong tao ang humadlang o gumalaw. Ang mabilisang pagbabagong ibig ng iilan na sinusunod ng bulag na taga-sunod, kabiguan ang sinasapit sa hulihan.

Sa naganap na pagkilos sa Luneta, masasabing tama ang inuusal na panagutin ang may mga sala ngunit mag-ingat sa galawan ng ilan na mapanggamit at una ang sarili at ‘di ang bayan. Ang ‘di napag-isipang kilos ang karaniwang nagsasadlak sa pinuno na lihis ang paniniwala higit sa kagalingan ng nakakarami. Ang isagka sa putikan ang may sala sa bayan ang iwasan at ganap na pag-isipan ng ‘di masadlak at masabing palpak ang kilos at pinulot sa kangkungan. Walang pangungutyang ibig ngunit ang pag-isipan ng may kalaliman at ganap na panalangin ang dapat gawin ng masilip ang liwanag sa dulo ng pagkilos at ‘di mapahamak ang kasapian. Ang suriin ang mga taong lumalapit na batid ang salang gawa sa bayan ang bigyan duda sa layon ng ‘di maisalang sa mali ang kasapian na ganap ang pagiging tapat at paniniwala sa namumuno.

Hindi malinaw ang dahilan ng pagkilos na ginawa ng sekta ngunit malinaw ang layon ng ilang tao o grupo na sumakay sa pagkilos, para sa sariling layon ang partisipasyon higit ang mga tao na may kinahaharap na usapin sa bayan. May kahusayan sumakay sa boses ng bayan ang ilang may usapin at maglubid ng istorya laban sa kung sino. Ang mailayo sa usapin ang mga sarili higit sa katiwalian ang layon na mabilis na maipaabot sa nakarami sa pamamagitan ng media at social media. Ang maitatwa ng kasinungalingan ang salang gawa sa pamamagitan ng pahayag ay nasa dulo ng daliri na mapupulot ng Pinoy sa media at social media. At ang layon na masasabing ‘di ganap na nasuri ng tagapamahala ng sekta.

Sa kabilang banda, lumalabas ang tanong sa dahilan ng pagkilos ng sekta na kilala sa galawang may ibig ipaabot na pansarili. Pagbabago ba sa pamahalaan ang dahilan ng pakilos o may nag-udyok sa tagapamahala ng sekta upang pakilusin ang kasapian at may abutan sa hulihan. Maselan ang tinahak na landas ng tagapamahala ng sekta na batid ang lapit ng mga dating lider sa pamilya ng kasalukuyang lider ng bansa. Ang galawan bang naganap ang tatakip sa usapin na kaperahan at pagsisiguro sa kinabukasan ng silyang inuupuan. May naulinigan na may malalim na usapin ang tagapamahala ng sekta na hinaharap higit ang usaping bayarin sa ‘di matagumpay na proyekto sa Bulacan na kasalukuyang nilalangaw. Totoo ba ang sabi – sabi na bigo ang tagapamahala na punuan ang usapin ng bayarin sa nakaraan at kinahaharap sa kasalukuyan.

Hindi maisasantabi ang kalakasan ng sektang nagdaos ng pagkilos upang ipaabot ang ibig na pagbabago sa pamahalaan. Ang ipinamalas na pagkilos ang larawan ng nakaraan sa panahon na ‘di inagawang maibalik o maisalba ang minsang sikat na pangulo na sinipa sa EDSA 2. Ang kilos na gawa sa Luneta sa lumipas na mga araw ay nagbalik at naulit na sinabuyan ng malamig na tubig at ‘di nakapasok sa ikatlong araw ang pagkilos. Salamat at naging mapanala ang ilang lider na nasa baba at ‘di hinayaan na makapasok ang ibang grupo na iba ang layon at isulong ang pakay na pansarili. Sa totoo lang, napaabot ng pagkilos ang mensaheng ibig ngunit ‘di ganap na nakuha ang adhikain higit ang mapalitan ang lider ng bansa na siyang rurok ng layon.

Sa totoo pa rin, malinaw na may tumaya sa palpak na pagkilos at ang dapat alamin ng pamahalaan kung sino ang mga ito. Ang ‘di nakamit na adhikain sa pagkilos ang galawan na magsasalang sa mga nagnasa na mapanagot sa ngalan ng hustisya. Sa pahayag ni Jun Singhot, malinaw na magaganap ang kinatatakutan ng ilan na haharap sa mga pagdinig ang mga may sala na nasisilip na tumaya sa pagkilos ng makawala sa anomalyang kinasasangkutan, ang anomalya sa multong proyekto. Malinaw ang banggit ni Jun Singhot na pananagutin ang may sala, malapit o ‘di malapit sa pamahalaan dahil ang sala’y gawa sa bayan.

Sa totoo lang, nararapat na panagutin ang may sala sa bayan dahil ang katarungang hanap ang serbisyong asam ng mga taong pumasan sa salang gawa ng mga opisyal ng bayan na nanumpa ng serbisyong tapat sa bayan. Matalas ang pahayag ni Jun Singhot hinggil sa mga opisyal na pananagutin sa mga salang gawa ang silip na pagpapakilos sa sekta na kinapital ang pagiging tapat ng kasapian sa tagapamahala, at ang nakakaluha. Ang paharapin ang mga opisyal na banggit sa mga pahayag at nakitaan ng dahilan sa usapin ng korapsyon ang inaasahang magaganap sa susunod na mga araw. Walang pagdadalawang isip na may mapananagot na dahilan sa dalangin na magtagumpay sana na pagkilos sa nakaraang araw. At sa pagka-bigo ng pagkilos, ganap ang takot na aabutin ng indulto, higit ang mga sabit sa anomalya ng multong proyekto.

Sa huling bahagi, nasilip ni Mang Juan ang pag-iwas ng grupo ni Bilyonueba sa pagtitipon ng isang sekta na nagtungo sa Luneta. Walang tuwirang dahilan na banggit ngunit ‘di maalis sa isip ni Mang Juan ang pagsusugal ang layon ng lumambot ang tindig ni JunSinghot sa senador na malapit kay kuya Edi. Wala mang pangalang banggit ang puno ng Balite ng Malacanan ngunit malakas ang dating na kabilang ang malalaking pondo na nawala sa Bulacan ang senador na ‘di nakiisa sa pagkilos sa Luneta. Umaasa na ang ‘di paglahok ang pagkilos sa Luneta ang maging dahilan sa paglambot sa tindig ni Jun Singhot sa senador na sangkot sa mga multong proyekto.

Sa totoo lang, naipaabot sa pamahalaan ang mensahe na malinis na pamamahala ngunit tumaliwas ang galaw na ‘di kailangan ang malakihang pagtitipon. Kaisa ang bayan sa ibig na malinis na pamamahala ngunit ang palpak ang galaw na nagbilad sa bansa sa mundo na makaiwas sa pananagutan ang ilan na kayang magbayad ng mga pagkilos ng maramihan at ang salang mensahe. Sa tagapamahala ng sekta, huwag gamitin ang kasapian sa pagtatakip sa sala ng iba na nag-aabot ng kaperahan upang makahulagpos sa salang gawa, pagnanakaw. Panagutin ang magnanakaw at huwag gamitin ang masang kasapian ng ‘di masabing palpak o talunan ang sektang ‘di kamag anak ni Jose Manalo.

Maraming Salamat po!!!!