ANGELICA PANGANIBAN AT ZANJOE MARUDO SUMABAK SA 2ND CHANCES SA UNMARRY

Ni Rommel Gonzales

“May pag-asa pa bang magsimula muli matapos ang isang ‘goodbye’?” Ito ang sentrong tanong ng Unmarry, ang isa sa pinakaabangang entry sa Metro Manila Film Festival (MMFF) 2025 mula sa Quantum Films at CINEKO Productions.

Isang makabagbag-damdaming family drama, tinatalakay ng pelikula ang tapang harapin ang katapusan, ang sakit ng nawalang pag-ibig, at ang pag-asang muling makahanap ng kaligayahan.

Pinangungunahan nina Angelica Panganiban at Zanjoe Marudo, ang Unmarry ay nagmamarka sa inaabangan at makabuluhang pagbabalik para sa dalawang bituin—hindi lang sa pangunahing movie roles at sa MMFF matapos ang kanilang kinikilalang pagganap sa One More Try, kundi pati na rin bilang reunion project nila kasama si direk Jeffrey Jeturian matapos ang kanilang pagtutulungan sa hit ABS-CBN series na Playhouse. Ipinapakita ng pelikula ang kanilang lalim, chemistry, at husay sa pagdadala ng emosyon habang ginagampanan ang mga karakter na sina Celine at Ivan—mga taong hinaharap ang pait ng pagtatapos at ang posibilidad ng panibagong simula.

Tampok sa Unmarry ang kwento nina Celine (Angelica) at Ivan (Zanjoe) na habang pinapasan nila ang pagtatapos ng kani-kanilang marriages at ang hamon ng pagpapalaki ng mga anak, kasabay ng sarili nilang emosyonal na laban. Nagtagpo ang kanilang landas sa law office ni Atty. Jackie, isang abogado at YouTube personality, at dahil sa sunod-sunod na aberya sa court schedules, unti-unting umusbong ang isang hindi inaasahang pagkakaibigan—at marahil, isang panibagong pag-ibig.

Ibinahagi ni Angelica Panganiban kung ano ang nag-udyok sa kanya na tanggapin ang proyekto: “Siguro unang una yung tiwala sa mga makers nung film… nung narinig ko na yung kuwento, yung simplicity nung story niya but at the same time very complex.”

“Ang ganda ganda nung atake, nung storytelling, na hindi siya nanghihingi ng kahit anong bigness… Ang tahimik ng atake ng storytelling niya,” dagdag niya.

Kasama rin sa cast sina Tom Rodriguez, Solenn Heussaff, at award-winning actress Eugene Domingo, na bawat isa’y nagdadala ng sariling kulay at lalim sa pelikula.

Sa ilalim ng direksyon ni Jeturian at panulat nina Therese Anne Cayaba at Chris Martinez, naghahatid ang Unmarry ng isang matimbang, makatotohanang drama na siguradong tatagos sa puso ng manonood.

Mapapanood ang Unmarry simula December 25 sa mga sinehan.