Rep. Garbin binulgar jueteng sa Albay; P40 Milyon nawawala sa gobyerno kada buwan!

Umaabot sa halagang P40 milyong piso ang nalulugi sa gobyerno at napupunta sa bulsa ng mga Gambling Lord sa Lalawigan ng Albay, ito ang mensahe sa isinagawang talumpati kamakalawa sa mababang kapulungan ni AKO BICOL Party-list Representative Alfredo A. Garbin Jr., kung saan inilahad nito ang umano’y muling paglaganap ng ilegal na operasyong jueteng sa Lalawigan ng Albay at nagbabala tungkol sa malaking pagkawala ng pondong gamit pang publiko.

Binigyang-diin ni Garbin na ang kanyang pagbubunyag ay bunsod ng agarang pangangailangang tugunan ang tinatayang ?40 milyong buwanang pagkawala sa remittance para sa Philippine Charity Sweepstakes Office (PCSO) matapos ang biglaang pagpapatigil ng operasyon ng Small Town Lottery (STL) sa lalawigan.

“Kapag pinutol ang legal na kita, ang taumbayan ang nagdurusa,” diin ni Garbin.

Biglaang Pagpapatigil ng STL, Nagdulot ng mga Tanong.

Ibinunyag ni Garbin na ang operasyon ng STL sa Albay ay bigla umanong itinigil noong Disyembre sa kabila ng pagkakaroon nito ng balidong permit hanggang Oktubre 2026, nang walang malinaw, legal, o transparent na paliwanag.

Nagbabala siya na ang pagsasara ng isang legal, regulado, at kumikita para sa kawanggawang sistema ay lumikha ng puwang na mabilis namang napunan ng ilegal na sugal.

Mga Personalidad at Grupo, Pinangalanan

Sa kanyang talumpati, tinukoy ni Garbin ang mga alegasyon na iisang grupo, na umano’y tinatawag na “ZagNim,” ang pinapayagang mag-operate ng jueteng sa lalawigan.

Ayon sa kanya: Ang “Zag” ay iniuugnay umano kay Jun Alegre, na inilarawan bilang kaalyadong politikal at dating katambal sa pagtakbo bilang bise-gobernador ng Gobernador ng Albay na si Noel E. Rosal.

Ang “Nim” ay iniuugnay umano kay Alwing Nimo, na kanyang kinilala bilang isang umaming tagapagbayad ng jueteng payola sa mga nakaraang kontrobersiya.

Binanggit din ni Garbin si Albay Police Provincial Director Col. Noel Nuñez kaugnay ng umano’y mga utos na ipinarating sa mga lokal na yunit ng pulisya hinggil sa operasyon ng jueteng.

Ibinunyag pa niya na ilang alkalde ng mga bayan ang umano’y nakatanggap ng mga kahilingan mula kay Nimo upang mabigyan ng pahintulot na mag-operate sa kani-kanilang nasasakupan.

Umano’y Padron sa Ilalim ni Gov. Noel Rosal

Itinampok ng mambabatas ang tinawag niyang paulit-ulit na padron sa ilalim ng administrasyon ni Noel E. Rosal, kung saan itinitigil ang legal na operasyon ng STL at sinusundan ito ng muling pag-usbong ng ilegal na jueteng.

Ayon kay Rep. Garbin Noong Hulyo 2022, ilang sandali matapos manungkulan, naglabas si Gov. Rosal ng cease and desist order laban sa operasyon ng STL sa Albay.

Ang pagsasara ng STL noon ay nagtulak sa operator na magsampa ng kasong kriminal laban sa gobernador, na ayon kay Garbin ay nakabinbin pa sa isang Regional Trial Court sa Quezon.

Binigyang-diin niya na ang kamakailang pagpapatigil ng STL noong Disyembre 2025 ay kahalintulad ng naunang insidente, na lalong nagpapatibay sa pangamba ng isang padron na umano’y nakikinabang ang mga sindikato ng ilegal na sugal.

“Pinatitigil ang legal na STL — at ang jueteng ay mabilis at lantaran namang bumabalik,” ani Garbin.

Nanawagan si Garbin sa Department of the Interior and Local Government (DILG), Philippine National Police (PNP), Criminal Investigation and Detection Group (CIDG), National Bureau of Investigation (NBI), at sa Philippine Charity Sweepstakes Office (PCSO) na magsagawa ng agarang, walang kinikilingan, at masusing imbestigasyon hinggil sa muling paglaganap ng jueteng sa Albay.

Posibleng proteksiyon o pagpapabaya sa ilegal na sugal ang umano’y pagkakasangkot ng mga opisyal ng gobyerno at mga tauhan ng law enforcement.

Hinimok din nito ang Mababang Kapulungan ng Kongreso na magsagawa ng mga pagdinig bilang tulong sa pagbuo ng batas hinggil sa usapin ng Tiwalang Bayan

Binigyang-diin ni Garbin na ang isyu ay hindi lamang lokal na usapin kundi isang pambansang alalahanin na sumasaklaw sa tiwala ng publiko, pondo ng bayan, at integridad ng pagpapatupad ng batas. (Cesar Barquilla)