KINATAWANG BASTOS

Isang pagpapatunay na ‘di kailangang manirahan sa kaTimugan sa paggagap sa kamangmangan ng idolong hunghang. Sa simula ‘di mawari na isang kinatawang bayan na manananggol sa batas na nagtapos sa mahusay na pamantasan pang abogasya ang ‘di nag-iisip ng ilalabas sa bibig. Ang kawalan ng pagninilay na namutawi sa bibig ang nagpasikat sa ‘di kilalang ngalan sa mababang kapulungan ang ‘di lang paghanga ang nadama sa isang sikat na artista, isang imahinasyon na nagpainit ng kalamnan. Hindi nagawang sarilinin ang imahinasyon at pagpapantasya sa isang magandang artista at inusal sa kagalang galang na tanggapan, sa Kamara, at sa pagdinig sa isang mahalagang usaping bayan. Hindi mawatas bakit sa usaping bayan na banggit ang imahinasyon ng kinatawan na walang ugnayan sa usaping tinatalakay. O’ pagpapatunay na ‘di iba ang katuwiran ng kinatawan mula sa Lungsod ng Quezon sa iniidolong si Totoy Oblo ng kaTimugan.

Nabigyan pansin sa bansa higit ng mga kababaihan na nagtaguyod ng kanilang Karapatan ang inusal ng kinatawan mula sa Lungsod Quezon na nag-init ang katawan kuno ng makita ang isang sikat na aktres. Walang pasubaling binangit ang labis na imahinasyon na nagpainit sa katawan sa aktres na dagling nakakuha ng negatibong pandamdam sa mga kapwa kinatawan na kababaihan. Hindi nagtatago nang pagkadismaya ang isang babaeng kinatawan at nagpahayag na dapat tigpasin sa tala ng usapin ng Komiting dumidinig ang banggit ng kinatawan mula sa lunsod ni Alkalde Belmonte. At nasundan ng iba pang pagpapahayag na kinokondena ang banggit na kinatawan.

Ang pag-uusal ng mga salitang may paghamak o pagyurak sa pagkatao ng iba, babae o lalaki’y ‘di tanggap sa kasalukuyang panahon higit kung nakakababa sa pagkababae. At ang higit na pinanggigilan ang inusal higit ng isang kagalang galang na kinatawan sa mismong harapan ng kapwa kinatawan na kagalang galang. Masasabing nakalimot ang kinatawan ng Lungsod Quezon sa RRA 11313 o ang Bastos Law na higit na pinagtibay ng konseho ng Lungsod Quezon na Gender and Development Code na minsang kinabibilangan ng kinatawan. Hindi inaalis ang pagiging matikas sa dalang kasarian ang kinatawan subalit ang lumagpas sa tinakda na dapat sundin ng lahat higit ang mga gumagawa ng batas na ipatutupad sa bansa. Ang magandang halimbawa’y nagsisimula sa mga may akda at nagpapatupad ng batas ng ganap na magagap ng karaniwang tao higit ang may kakulangan sa kaalaman sa mga batas, pambansa o ordinansa.

Sa pahayag ng kinatawan ng Lunsod Quezon, nakuha nito ang Taguri sa pagiging bastos at walang pakundangan sa dangal ng kababaihan. Ang ipangalandakan ang pag-init ng katawan sa nakitang kagandahan dahil sa bitbit na pwesto’y salang gawa sa isang marangal na kinatawang bayan. Pasintabi sa ibang mararangal na kinatawang bayan at mainam na maglagay ng panuntunan sa mga pagdinig na kailangang tupdin ng mga nakikibahagi sa pagdinig sa usaping nasa harap. Ang pahayag na walang bale sa usapin ang kagyat na alisin higit kung nakakababa sa pagkatao ng kapwa. Hindi inaalisan ng karapatan ang mga kinatawan na ibig mangusap sa usaping nasa harapan, subalit ang pag-isipan ang babangitin higit kung makakasakit at walang saysay sa tinatalakay ang kagyat na tanggalin sa nota ng pagdinig. At patawan ng kaukulang parusa ng ‘di tularan sa ibang pagkakataon.

Marangal ang institusyong kinakatawan at ganap na minamasdan ng mamamayan maging sa ibang bansa ang tamang kilos ng mga pinagkatiwalaan ng bayan. Sa totoo lang, higit na mainam ang Supremo ng senado na walang kibo ‘eh di walang sala sa halip na magmagaling gayung palpak ang sasabihin. O’ sadyang iisa ang kilos ng mga dilis mula sa baba patungo sa itaas, pawang mga mangmang sa kilos, sa salita at sa gawa.

Sa totoo lang, walang ibang aanihin ang kinatawan ng Lunsod Quezon kung hindi batikos at inaasahan na magmumula sa maraming grupo ng kababaihan at lingkod bayan na nagtataguyod ng kagalingan ng mga kababaihan. At inaasahan ang pagsasampa ng kaso laban sa kinatawan na maaaring magsuspindi bilang kinatawan o matanggal sa pwestong tangan. Sa darating na mga araw umaasa na ‘di maglilinis ng kamay ang liderato ng Kamara, maging ang Malacanan at kikilos upang mabigyan ng kaukulang disiplina ang kinatawan na sa mainit na kontrobersya. Malugod na susubaybayan ang pagkilos ng mga lider ng banggit na mga tanggapan sa disiplinang ipapataw sa kinatawan.

Sa kabilang banda, ikinatuwa ni Mang Juan ang pagkadismaya ng Alkalde ng Lungsod Quezon sa tinuran ng isang kinatawan ng lungsod sa buwan pa man din ng kababaihan. Ang paghingi ng paumanhin ang hinihingi ng alkalde sa kinatawan subalit alumpihit o ‘di magaganap higit sa tindig na ipinapakita. At sa totoo lang, ‘di makitaan ang kinatawan ng paghingi ng paumanhin na larawan ng tindig ng iniidolo na taga-kaTimugan. Ang tindig na matikas higit sa kababaihan ang ‘di ibababa higit walang tuwirang kasalanan na nagawa at pawang imahinasyon. Sa pagsusuri, magkapareho ang tindig ng mga mangmang mula kaTimugan at mga nalangisan ng salang kaisipan. Ang manlibak ng kapwa higit ramdam na mataas ang kalagayan ang galawan na ramdam sa mga mangmang. At sa totoo lang, ang pagtatago sa likod ng pwestong tangan ang kilos na pinangangalandakan. Hindi pausal subalit silip sa kilos ang pagiging bastos dahil sa kinalalagyan bilang kinatawan.

Sa huli, malinaw na bastos ang kinatawan ng Lungsod Quezon, na dapat ikahiya ng mga bumoto higit ang mga kababaihan. Ang pagkadismaya ng alkalde ng Lungsod ang malinaw na ‘di mauulit na mahalal ang bastos na kinatawan at inaasahan na ‘di sasangga sa pagpapaalis sa kinatawan. At sa kaganapan sa malawak na kapulungan, silip ang tindig ng kinatawan ang pag-ayaw sa pagpapasipa sa abalang pangulo. Malinaw na pansarili ang tindig, nag-iinit ang katawan dahil sa pagnanasa ‘di lang sa isang artista higit sa pag-asang makakabalik ang kaTimugan sa hinaharap.

Maraming Salamat po!!!!