JING, bagong social media app inilunsad sa singapore, dinagsa ng mga artista’t influencers!

Ni NONIE V. NICASIO

ISANG makasaysayang gabi ang nasaksihan sa Marina Bay noong March 29, 2026, matapos opisyal na ilunsad ang Jing, isang bagong social media platform na may ambisyong baguhin ang paraan ng kita at pakikipag-ugnayan ng mga content creator sa buong mundo.

Ginanap sa Hall 6 ng Golden Village Funan ang global launch na dinagsa ng mga negosyante, media executives, at digital creators mula Singapore at Malaysia. Punong-puno ang venue—isang malinaw na indikasyon ng matinding interes sa kung ano ang inaalok ng Jing.

Pinangunahan ang programa ng Swiss content creator na si Marion Muller, kasama ang mga Singaporean influencers na sina Megan Foo at Kathy Wong na nagsilbing segment hosts.

Dumalo rin sa naturang okasyon ang ilang kilalang personalidad tulad nina Arci Muñoz, Angeli Khang, at internationally acclaimed director at singer-songwriter na si Nijel de Mesa—na nagbigay ng dagdag na bigat sa kahalagahan ng event.

Ngunit higit sa presensiya ng mga kilalang pangalan, ang tunay na sentro ng usapan ay ang mismong platform.

ISANG BAGONG DIREKSYON PARA SA SOCIAL MEDIA – Sa kanyang keynote, ipinaliwanag ni Mr. Glen John Labasug, President-CEO at Founder ng Jing, ang kahulugan at layunin ng platform. Ang JING ay nangangahulugan ng Join, Interact, Network, Grow. Layunin nilang direktang iugnay ang engagement sa malinaw na oportunidad para sa monetization. Sa madaling salita, ang Jing ay hindi lamang espasyo para sa content—ito ay isang digital economy platform na ang interaksyon ay may katumbas na potensyal na kita.

Binigyang diin naman ni Chairman at Co-Founder na si Mr. Jing Turla ang mas malalim na prinsipyo sa likod ng proyekto. Aniya sa kanyang mensahe, na kung walang creators, walang mabubuong kultura, entertainment, o komunidad. Ang pananaw na ito ang nagsisilbing pundasyon ng Jing—isang platform na inuuna ang pangmatagalang kapakanan at sustainability ng mga creator.

Samantala, nilinaw ni Chief Finance Officer, Ms. Veron Valle ang istriktong pamantayan ng kompanya. Bawat feature sa Jing ay sinusuri batay sa isang tanong: kung nakakatulong ba ito sa mga content creators?

ISANG POSIBLENG PAGYANIG SA INDUSTRIYA – Sa panahong patuloy na kinukuwestiyon ng mga creator ang patas na hatian ng kita sa social media, ang pagpasok ng Jing ay maaaring magdulot ng malaking pagbabago sa umiiral na sistema. Sa pamamagitan ng direktang monetization mechanisms, layunin nitong alisin ang mga hadlang sa pagitan ng content at kita—isang hakbang na matagal nang hinihintay ng maraming digital creators.

AVAILABLE NA SA LAHAT – Opisyal nang available ang Jing para sa libreng download sa Google Play at Apple App Store, at bukas na ito sa mga creator at user sa buong mundo.

Sa gitna ng mabilis na pagbabago ng digital economy, isang tanong ang ngayon ay mas lalong umiingay: Ito na nga ba ang susunod na malaking yugto ng social media? Para sa marami, ang sagot ay nagsisimula sa isang simpleng hakbang— I-download ang Jing at maging bahagi ng pagbabagong ito.

(Nasa larawan sina: JING Chief Finance Officer, Ms. Veron Valle with special guests Arci Muñoz at Angeli Khang, Mr. Glen John Labasug (JING President & CEO) with Swiss Influencer Marion Muller)

-30-