Isko Moreno: ‘Di papogi, MBN ang sukatan ng tunay na pamumuno

Sa panahon ngayon, uso ang pulitika ng pabida. Maraming magaling magsalita, maraming mahusay mag-video, at mas marami ang eksperto sa pagpapapogi sa social media.

Pero kapag tinanong mo ang ordinaryong Pilipino kung ano ang talagang kailangan niya, iisa lang ang sagot – trabaho, edukasyon, ospital, at bahay.

Iyan ang tinatawag na Minimum Basic Needs (MBN). Hindi ito slogan. Hindi rin ito pakulo sa kampanya. Ito ang pinakapayak na obligasyon ng isang gobyerno.

Kaya hindi nakapagtataka kung bakit si Manila Mayor Francisco “Isko Moreno” Domagoso, laging nagsasalita nang may kumpiyansa. Hindi dahil sa yabang. Hindi dahil sa pag-aakalang siya ang pinakamagaling. Kundi dahil malinaw ang kanyang direksyon bilang isang lider.

Visionary ang tawag sa mga pinunong hindi lang tumitingin sa problema ng kasalukuyan. Mas nakikita nila ang pangangailangan ng susunod na dekada.

Para kay Yorme, hindi puwedeng puro ayuda habang-buhay. Mas mahalaga ang pagbibigay ng pagkakataong makabangon ang tao.

Ano ang silbi ng magandang talumpati kung walang ospital na mapupuntahan ang maysakit?

Ano ang halaga ng magagarang programa kung may batang hindi makapasok sa eskuwela dahil walang pambayad?

Ano ang saysay ng mataas na economic growth kung milyon-milyon pa rin ang walang disenteng trabaho?

Ano ang ipinagmamalaking pag-unlad kung libu-libong pamilya pa rin ang nakatira sa gilid ng estero, ilalim ng tulay, o sa mga lugar na anumang oras ay maaaring masunugan o bahain?

Ito ang dahilan kung bakit healthcare, education, jobs, at housing ang paulit-ulit na binibigyang-diin ni Isko Moreno. Dahil dito umiikot ang tunay na pag-unlad.

Kapag may maayos na serbisyong pangkalusugan, humahaba ang buhay ng tao.

Kapag may dekalidad na edukasyon, lumalawak ang pangarap ng kabataan.

Kapag may disenteng trabaho, hindi kailangang mangutang para lang makatawid sa araw-araw.

Kapag may sariling bahay, nagkakaroon ng dignidad ang bawat pamilya.

Ganito mag-isip ang isang lider na may bisyon. Hindi puro pansamantalang solusyon. Hindi puro palakpakan. Hindi puro pagpapabango ng pangalan.

Ang tunay na lider ay nagtatanong: “Ano ang iiwan kong pundasyon kapag wala na ako sa puwesto?”

Ito marahil ang dahilan kung bakit hindi natitinag si Yorme sa mga batikos. Alam niyang hindi lahat ng proyekto ay agad mapapalakpakan. Ang mga programang tumutugon sa minimum basic needs, hindi laging viral. Nguni’t ang epekto nito pangmatagalan.

Hindi kasi nasusukat ang husay ng isang alkalde o pangulo sa dami ng ribbon-cutting o sa haba ng motorcade.

Ang sukatan ay kung ilang bata ang nakapag-aral.

Ilang pasyente ang nagamot.

Ilang manggagawa ang nagkaroon ng hanapbuhay.

At ilang pamilya ang nagkaroon ng ligtas at disenteng tahanan.

Kapag natugunan ang apat na haliging ito, kusang susunod ang kaunlaran. Kusang lalago ang ekonomiya. Kusang aangat ang antas ng pamumuhay.

Sa huli, ang pamana ng isang pinuno ay hindi nakaukit sa billboard o campaign jingle. Ang tunay na pamana ay makikita sa mga pamilyang hindi na nagugutom, sa mga batang nakapagtapos ng pag-aaral, sa mga manggagawang may marangal na trabaho, at sa mga magulang na nakauuwi sa sarili nilang tahanan.

Iyan ang esensya ng pamamahalang nakasentro sa tao.

At iyan ang dahilan kung bakit, sa bawat pagkakataon, may kumpiyansa si Yorme Isko Moreno. Dahil hindi kasikatan ang kanyang panukat ng tagumpay kundi ang pagtugon sa Minimum Basic Needs ng bawat Pilipino.

“Hindi mabubusog ang tao sa pulitika. Ang kailangan nila trabaho. Hindi makakagamot ang slogan. Ospital ang kailangan. Hindi maitatayo ng pangako ang bahay ng mahirap.”
***
Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com.