MAYNILA, NASUNGKIT ANG WORLD AWARD!

Muling itinanghal ang Lungsod ng Maynila sa pandaigdigang entablado matapos nitong tanggapin ang Special Achievement in GIS (SAG) Award mula sa Esri, ang nangungunang kumpanya sa mundo sa larangan ng Geographic Information Systems (GIS), sa ginanap na Esri User Conference 2026 sa San Diego, California nitong Miyerkules ng hapon (local time), o Huwebes ng umaga sa Pilipinas.

Pinangunahan ni Mayor Francisco “Isko” Moreno Domagoso ang delegasyon ng Maynila sa pagtanggap ng prestihiyosong parangal. Ang Lungsod ng Maynila ang nag-iisang awardee mula sa Pilipinas sa 197 organisasyong pinili mula sa mahigit 700,000 organisasyong gumagamit ng Esri technology sa buong mundo.

Kabilang ang Maynila sa mga kinilalang organisasyon at ahensya mula sa iba’t ibang bansa gaya ng Land Transport Authority ng Singapore, Disaster and Emergency Management Presidency ng Turkey, Humanitarian Aid Unit ng Switzerland, Habitat for Humanity International, Wajima City ng Japan, at Regional Centre for Mapping of Resources for Development ng Kenya.

Iginagawad ang Special Achievement in GIS Award sa mga pamahalaan at organisasyon na nagpapakita ng natatanging inobasyon at kahusayan sa paggamit ng GIS technology upang mapahusay ang serbisyo publiko, mapabuti ang paggawa ng mga desisyon, at maging mas episyente ang operasyon ng pamahalaan. Ang mga napipili ay yaong may malinaw na naidudulot na positibong epekto sa kanilang mga mamamayan at komunidad.

“Hindi namin nakuha ang parangal na ito nang nagkataon lamang. Bunga ito ng sipag, dedikasyon at inobasyon ng ating disaster risk reduction at GIS teams. Ipinagmamalaki ko ang bawat isa sa kanila,” ani Domagoso.

Dagdag pa ng alkalde:

“Ang parangal na ito ay para sa mga kababaihan at kalalakihan ng Manila City Disaster Risk Reduction and Management Department sa pamumuno ni Director Arnel Eustacio Angeles, at sa bawat miyembro ng aming GIS team na nagsumikap upang maisakatuparan ito.”

Ayon kay Domagoso, ang pagkilalang ito ay patunay na kaya ng Maynila na makipagsabayan sa mga nangungunang lungsod sa buong mundo pagdating sa paggamit ng makabagong teknolohiya.

“Pinatutunayan ng pagkilalang ito na kayang tumayo ng Maynila kapantay ng mga pinakaunlad na lungsod sa mundo. Maaaring isa tayong umuunlad na bansa, ngunit sa tamang mga tao, tamang teknolohiya at matibay na paninindigan, kaya nating makamit ang world-class na resulta.”

Sa pamamagitan ng GIS, higit na napahusay ng pamahalaang lungsod ang kahandaan at pagtugon sa mga sakuna sa pamamagitan ng digital mapping, spatial analysis, at real-time data monitoring. Malaki ang naitulong ng mga ito sa mas mabilis at mas episyenteng pagtugon sa mga pagbaha, sunog at iba pang emergency sa anim na distrito ng Maynila.

“Kapag namumuhunan tayo sa teknolohiyang tulad ng GIS, namumuhunan tayo sa kaligtasan at kapakanan ng bawat Manileño. Ito ang uri ng pamahalaang tunay na nagsisilbi sa mamamayan,” sabi pa ng alkalde.

Binigyang-diin din ni Domagoso na ang tunay na layunin ng pamahalaang lungsod ay hindi ang mangolekta ng mga parangal kundi ang mapabuti ang serbisyo publiko.

“Hindi kailanman naging layunin ng aming administrasyon ang mag-ipon ng mga parangal. Ang layunin namin ay mailigtas ang buhay ng mga tao, maprotektahan ang mga komunidad, at maibigay ang pinakamahusay na serbisyo publiko. Kung ang aming pagsisikap ay kinikilala sa pandaigdigang antas, buong pagpapakumbaba namin itong tinatanggap.”

Ayon pa sa alkalde, magsisilbing inspirasyon ang parangal upang lalo pang pagbutihin ang paglilingkod sa mga Manileño.

“Ang pagkilalang ito ay lalo lamang nagbibigay sa amin ng inspirasyon upang pagbutihin pa ang aming trabaho. Patuloy kaming mamumuhunan sa inobasyon at teknolohiya dahil bawat pagpapahusay na ginagawa natin ngayon ay nangangahulugan ng mas ligtas na Maynila para sa mga susunod na henerasyon.”

Aniya, ang tagumpay ay hindi lamang para sa City Hall kundi para sa bawat residente ng lungsod.

“Hindi lamang tagumpay ng Pamahalaang Lungsod ng Maynila ang parangal na ito. Tagumpay ito ng bawat Manileñong karapat-dapat sa isang pamahalaang handa, mabilis kumilos at tunay na nagpoprotekta sa buhay at ari-arian ng mamamayan.”

Umaasa rin si Domagoso na magsisilbing inspirasyon ang tagumpay ng Maynila sa iba pang lokal na pamahalaan sa bansa.

“Umaasa akong magsisilbing inspirasyon ang tagumpay na ito sa iba pang lokal na pamahalaan upang higit pang yakapin ang makabagong teknolohiya. Ang kahandaan sa sakuna ay hindi na isang opsyon—ito ay pananagutang dapat nating gampanan para sa bawat Pilipino.”

Kasama ni Domagoso sa San Diego sina Manila City Assessment Department Officer-in-Charge Atty. Ma. Cristina Fernandez, Manila GIS Team Leader Ramon Jefferson Verano, at Manila City Disaster Risk Reduction and Management Department Research and Planning Chief Christian John Evangelista.

Dumalo rin ang alkalde sa Executive Session ng Esri User Conference 2026, isang eksklusibong pagpupulong ng mga pandaigdigang lider sa GIS kung saan tinalakay ang mga makabagong kaalaman, pinakamahusay na mga pamamaraan, at mga inobasyon sa paggamit ng ArcGIS.

Sa pagtatapos, sinabi ni Domagoso:

“Ngayon ay kinilala ng mundo ang Maynila. Ngunit bukas, mas magsisikap pa kami dahil ang pinakamahalaga naming tungkulin ay hindi ang manalo ng mga parangal kundi ang mapangalagaan ang buhay ng bawat Manileño.”(BP)