Aby Maraño, nagretiro na sa professional volleyball

TULUYANG nagpaalam sa professional volleyball si Aby Maraño matapos ang 22 taon ng paglalaro, dala ang isang karerang puno ng tagumpay, hamon, sakripisyo, at pagmamahal sa sport.

Sa kanyang emosyonal na pahayag, sinabi ni Maraño na hindi naging madali ang desisyong tuldukan ang kanyang career bilang professional volleyball player. Gayunman, sa kabila ng sakit ng pamamaalam, nakaramdam siya ng kapayapaan dahil alam niyang naibigay na niya ang lahat sa larangang minahal niya nang mahigit dalawang dekada.

Ayon kay Maraño, matagal na niyang alam na darating ang panahon na kailangan niyang isara ang kabanata ng kanyang buhay bilang isang propesyunal na manlalaro.

“Hindi dahil hindi ko na mahal ang volleyball. Hindi dahil hindi ko na kayang maglaro. But because after 22 years, alam kong naibigay ko na ang lahat,” pahayag niya.

Binigyang-diin din ng volleyball star na wala na siyang hinahabol pa sa kanyang karera at wala siyang pinagsisisihan sa kanyang naging paglalakbay.

“BINUHOS KO LAHAT. LAHAT. LAHAT,” mariing saad ni Maraño.