Bgy. Kagawad, 2 pa patay sa salpukan ng van at trike

NASAWI ang tatlo katao kabilang ang isang barangay kagawad, habang tatlo pa ang sugatan nang magbanggaan ang tricycle at van na pag-aari ng lokal na pamahalaan sa Lope de Vega, Northern Samar noong Martes.

Kinilala ang mga nasawi na sina Amalia Arnio, 51 anyos, kagawad sa Barangay Bayho; Dennis Cailo, 38, driver ng tricycle; at pasaherong si Rosa Galvan, 60.

Samantala, ginagamot sa isang ospital ang tatlong sugatan.

Sa ulat, patungong Calbayog City ang van na nakarehistro sa Northern Samar Provincial Health Office nang mawalan ito ng kontrol habang minamaneho ni Joel Lutao, 44, sa national highway sa Barangay Bayho, Lope de Vega 8:00 nang umaga. Napunta ito sa kabilang lane at nasalpok ang tricycle na minamaneho ni Cailo na may sakay na dalawang pasahero.

Hindi naman nasugatan si Lutao na nasa kustodiya ng Lope de Vega Municipal Police Station.

Kakasuhan ito ng Reckless imprudence Resulting in Multiple Homicide, Multiple Serious physical Injury at damage to property.