MALILIGO NG DUGO

Inusal ng marahas mula sa kaTimugan ang ganap na asal na ‘di mapasakanya ang gusto sa hinaharap. At walang pag-aalinlangang binabato ng masangsang na pananalita ang mga taong sumasalungat sa gawang sala upang takutin at maumid. Ang minsang natanganang ng ama ang liderato ng bansa ang nagpalaki sa ulo ng kaTimugan na tila pag-aari ang bansa at dapat sumunod sa ibig, maging tama o mali. Sa pagkakatangan sa ikalawang pinakamataas na pwestong sa pamahalaan hindi nagawang magpakumbaba sa halip nagpamalas ng higit na kasibaan sa paglustay ng salaping bayan. Sa totoo lang, hindi nagawang magpatuloy sa buhay at tila inaangkin ang liderato ng bansa kahit alam na lipas ang panahon ng liderato ng amang nasa malayong lupain. Sa katunayan ang ama’y humaharap sa sakdal sa ICC sa salang walang habas na pagpatay sa mga biktima ng bigong laban sa droga.

Lumipas ang halalan at kinagisnan ng bayan ang mga nagsipagwagi higit ang sa bugok na kapulungan na tatayong hukom sa pagpapasipa kay Inday Siba. Sa lumabas na mga nagwagi sa halalan, lumakas ang loob ng abalang pangulo at naghahamon na kagyat na ganapin ang pagdinig sa pagpapasipa at walang takot na haharapin ang taga-usig maligo man sa dugo. Iisa ang pumasok sa isip sa tinuran ng abalang pangulo, may bilang ba ito na pinanghahawakan sa dulo ng usapin sa pagpapasipa? O’ sapat ba ang bilang o dami ng titindig na hukom sa panig ng pagpapawalang bisa sa pagpapasipa, at nasabing handang harapin ang usapin kahit dumanak o maligo sa dugo? Muli at sa pagsapit sa huling yugto ng pagdinig sa pagpapasipa sa abalang pangulo, sapat ba ang bilang ang nasa panig na ‘di masisipa si Inday Siba ayon sa resulta ng naganap na halalan?

Masasabing lumakas ang loob ng abalang pangulo sa pagpapahayag na haharapin ang mga kalaban sa politika na may hamon na magkakaroon ng “blood bath” ang pagdinig. Ang pahayag at tayong tila may bilang na pagpapawalang sala kay Inday Siba. Ngunit ang pahayag na maliligo sa dugo ang larawan ng nakaraang pamahalaan na ang ‘di makuha sa pananakot, suhol ang mamamatay o pumatay ang paraan na may kagalingan. At ang ‘di mabilang na nautas sa panahon ng lumang pamahalaan na nagdala sa dating pangulo sa pagharap sa usapin ng ICC ang usal ng anak na abalang pangulo ng bansa laban sa mga kritiko. Sala, ang pagpapahayag na dadanak ang dugo ng isang mataas na halal ng bayan dahil uusigin sa salang paggamit ng salapi ng bayan. Sa totoo lang, hindi inaasahan ang pahayag ng pagdanak ng dugo mula sa isang babae higit sa isang halal at nagmula sa kilalang pamilya, kilalang pamilya sa karahasan at kawalang respeto. Hindi tanggap ang pahayag na “blood bath” mula sa lider na may kabatiran sa umiiral na batas na natutunan at inaaral sa nakaraan.

Sumibol ang ikalawang lakas ng loob ni BB (Blood Bath) Inday sa resulta ng halalan sa nakaraan kung saan ang nagpanalo ang mga kaalyado na mapapabilang sa bubuo na huhukom sa usapin na sa kanyang harapan. Ang usaping bilang ang magdidikta sa darating na panahon at nakasalalay ang mga susunod na hakbang. Ang nakuhang bilang ng mga senador sa nakaraang halalan ang nagbigay kompiyansa kay BB Inday at maghamon ng maliligo sa dugo ang nakapukaw o pumukaw sa nakakarami na wala sa tamang pag-iisip si BB Inday. Hindi nakakapagtaka o surpresa ang umusal si BB Inday na palaban dahil nasa dugo ang pagiging marahas maging sa pag-utas ng tao na balakid sa mga gawain o sa ibig. Di mawala sa isip ni Mang Juan ang kapatid ni BB Inday na nanakit sa isang bahay aliwan dahil sa isang babae. Ano pa ang aasahan?

Sa bilang sa usapin ng pagpapasipa kay BB Inday sa hanay ng bugok na kapulungan, malinaw na malaki ang sablay ng administrasyon na nagbigay lakas loob sa abalang pangulo na hamunin ‘di lang ang mga uusig sa higit ang administrasyon sa kahinaan sa pagdadala sa mga kakampi sa halalan. Hindi natamo ang sapat na bilang ng mga senador na tatayong hukom na sisipa kay BB Inday. Ang ‘di sapat na bilang ng mga nagwaging senador at ang mga dadatnan sa bugok na kapulungan ang sinandalan ng lakas ng loob ni BB Inday. Sa bilang ng mga senador na nasa manggas ni Inday ang hamon sa malawak na kapulungan na dapat husayan ang paglalahad at ang mapatunayan sa dokumentong tangan ang magpapabago sa tindig ng mga senador. Walang hindi lalambot sa tamang tindig higit kagalingan ng bayan ang nakasalang. Ang kaganapan sa halalan ang dikta na galing sa mamamayan na ‘di matatawaran ng sino mang halal ng bayan.

Sa totoo lang, ang pagpapanagot sa mga lumapastangan sa bayan na lantarang binabalahura ng ilang halal ng bayan ay walang lugar na manatili sa pwestong tangan. Ang kakaibang resulta ng halalan na malayo sa inaasahan ang naglalarawan na ibig ng bayan sa yugto ng kasaysayan ng tunay na pagbabago para sa lahat ng Pinoy. Walang sinisino, walang itinatangi at tapos na ang panahon ng paninikil at pagmamalabis sa bayan ang dapat na maging kaganapan sa kasalukuyang panahon at sa darating. Nakasalang sa pagpapasipa kay BB Inday ang salaping bayan na nilustay ng walang kapararakan. Ang tindig sa katotohanan ang inaasahan na magaganap sa pagdinig sa bugok na kapulungan. Ang paghaharap ng mga taga-usig ng sapat na pagpapatunay sa salang gawa’y nakasulat na sa dingding ng bayan na babasahin na lang ng mga hahatol na senador.

Malakas ang panawagan na igawad ang tama at ayon sa salang gawa, inaasahan na masisipa sa pwesto ang abalang pangulo na wala sa lugar ang katapangan. Ang natikman sa nakaraan na maalwang buhay at kapangyarihan na ‘di ibig mawala ang sapat na dahilan ng paghahamon na kahit dumanak o maligo ng dugo’y magagawa dahil ito ang kagalingan sa nakaraan. Walang pagpipigil sa gagawin sa pagpapasipa kay BB Inday, ang tama at makatarungan hatol para sa bayan ang inaasahan na magaganap sa dulo ng pagdinig. Ang mawala ang lahing mapagmalabis sa bayan at mamamayan ang hiling na igagawad ng mga kinatawan sa bugok na kapulungan. Di kailangan ang maligo sa dugo ang masipa si BB Inday’ sapat na kay Mang Juan at sa bayan.

Maraming Salamat po!!!!