Seguridad ni Madriaga sa impeachment ni VP Sara, pinahigpitan

INATASAN ng House Committee on Justice ang House sergeant-at-arms na higpitan ang seguridad ng detainee na si Ramil Madriaga, na itinuturing na isang “material at indispensable” na testigo sa impeachment proceedings laban kay Vice President Sara Duterte.

Sa utos ni Justice Committee chair at Batangas Rep. Gerville Luistro, pinatitiyak ang kaligtasan ni Madriaga na nakapiit sa Bureau of Jail Management and Penology facility sa Camp Bagong Diwa.

Kabilang sa mga hakbang ang dagdag na security mula sa National Bureau of Investigation (NBI) at mahigpit na pagbabantay sa kanyang transportasyon para sa pagdalo niya sa mga pagdinig.

Ang direktiba ay bunga ng petition for protective custody ni House Deputy Minority Leader at Akbayan Rep. Chel Diokno matapos matukoy ang banta sa buhay ni Madriaga, na nahaharap sa kasong kidnapping at umano’y bagman ni VP Sara na nagsiwalat na pinondohan umano ang kaniyang kandidatura ng Philippine Offshore Gaming Operator (POGO) at drug dealers.

Nakatakda ang susunod na impeachment hearing sa Abril 14, kung saan kinakaharap ng Bise Presidente ang mga reklamong umano’y misuse ng confidential funds, pagbabanta laban kina Pangulong Ferdinand Marcos Jr., at hindi maipaliwanag na yaman.