Kayang gamitin ng Panginoon ang Pilipinas kahit maraming problema – Cayetano

Sa gitna ng mga problema sa ekonomiya at pulitika, makaaasa ang mga Pilipino sa Diyos at maniwala na patuloy pa rin Niyang gagamitin ang bansa.
Sa isang Facebook Live nitong Martes, April 7, ibinahagi ni Senate Minority Leader Alan Peter Cayetano ang kanyang ‘3Ps framework’ – purpose, potential, and power — at ipinaliwanag kung paano ito naaangkop sa kasalukuyang sitwasyon ng bansa at sa personal na buhay.
“Sobrang daming pagsubok ang ating dinadaan and everyone is telling us that it will get worse with what’s happening… But remember that God always gives hope, always gives an answer,” sabi ni Kuya Alan.
Aniya, naangkop ang 3Ps sa bansa dahil maaaring gamitin ng Diyos ang Pilipinas bilang instrumento ng pagpapala o gamitin ang ibang bansa upang tulungan ang mga Pilipino sa oras ng pangangailangan.
Ginawa niyang halimbawa ang kwento sa Bibliya ni Joseph, kung saan isang bansa ang nakatulong sa iba upang makaligtas sa krisis.
“Nagkaroon ng napakalaking famine, pero ginamit si Joseph. Noong marami pang ani, nakapag-store siya sa warehouse. Kaya ginamit ang Egypt noon. Kaya pwedeng gamitin ni Lord ang kahit anong city at kahit anong probinsya. Pwedeng gamitin ni Lord ang Pilipinas o pwedeng gamitin y’ung iba at maging blessing sa atin,” aniya.
Sa personal na aspeto, sinabi niya na bawat isa ay binigyan ng Diyos ng layunin kasama ang potensyal at mga kakayahan upang maisakatuparan ito.
Binanggit niya bilang halimbawa ang kanyang layunin na pagpapalakas ng pamilyang Pilipino sa pamamagitan ng mga panukalang batas. Aniya, kung gusto ng Diyos na makagawa siya ng mas marami pang mabuti, bibigyan siya ng kakayahan at suporta upang matupad ito.
“If God meant to sponsor 10 (laws) and I only sponsored 5, hindi ko nagawa ang potential ko. And if talagang 10 (laws) y’ung purpose ko, bibigyan Niya ako ng power at ng resources para dun sa 10, (laws),” wika ni Kuya Alan.