Ateneo, La Salle nangunguna sa UAAP golf

NAITALA ni Monique Mendoza ng Ateneo ang 81 upang makuha ang pamumuno sa women’s individual competition sa opening round ng kauna-unahang UAAP Season 88 golf tournament sa Tagaytay Midlands.

Kinuha naman ni Annika Gozum ng University of the Philippines ang solo ikalawa na may 82 samantalang si Julia Lua ng La Salle, na namayagpag sa nakaraang kauna-unahang ICTSI Intercollegiate Tournament at naghatid sa koponang nakabase sa Taft sa kampeonato ng team, ay pumangatlo na may 86.

Si Alexa Dacanay ng La Salle ay ika-apat na may 87, kasunod si Simi Tinio ng Ateneo (88), Donnabel Magsino ng La Salle (92), Andie Joson ng Ateneo (94), Deborah Escote ng UST (96), Ava Heredia ng UP (99) at Renee Heredia ng Ateneo (100).

Umarangkada rin ang Ateneo sa maagang pangunguna sa kompetisyon ng koponang pambabae matapos makabuo ng 263.

Naglista ang La Salle ng 265 para sa ikalawang puwesto na sinundan ng UP (288), UST (302) at Adamson (365).

Sa men’s division, nagtapos si Perry Bucay ng La Salle sa 72 upang makuha ang isang stroke na pamumuno laban sa kanyang kakampi na si Zachary Castro (73) sa indibidwal na kompetisyon.

Ang mga taga-UP na sina Joshua Buenaventura (74) at Miggy Roque (75) ay nasa ikatlo at ikaapat, ayon sa pagkakasunod.

Si Miguel Fusilero ng La Salle ay nakapuntos ng 76 upang makasama sa ikalimang pwesto kay Glenn Unabia ng Ateneo, habang kontrolado ng Green Archers ang team standings sa apat na bibilangin, tatlong laro na format na may kabuuang 221 — limang stroke ang lamang sa UP, na nakapuntos ng 226 kung saan kasama ang 77 ni Emilio Carpio.

Nasa ikatlong pwesto ang Ateneo na may kabuuang 240 pagkatapos magtala ng 80 at 84 sina Juan Escano at Schmuel Tan, ayon sa pagkakasunod. Nasa ikaapat ang UST (261) na sinundan ng Adamson (370).