1,000 BAGONG RECRUIT NA CORRECTIONS OFFICER 1 , SUMUMPA NG KATUNGKULAN SA BUCOR

Pinamunuan ni Director General Gregorio Pio P. Catapang Jr. ng Bureau of Corrections ang sabay-sabay na seremonya ng panunumpa ng 1,000 bagong recruit na Corrections Officer 1 (CO1) ngayon sa National Headquarters sa Muntinlupa City.

Ang mahalagang pangyayaring ito ay nagmarka ng isang bagong kabanata para sa Bureau habang naghahanda ang mga opisyal na ito na maglingkod sa iba’t ibang correctional facility sa buong bansa.

Sa 1,000 recruit, 455 ang itatalaga sa New Bilibid Prison and Correctional Institution for Women, 200 sa Davao Prison and Penal Farm, 92 sa Iwahig Prison and Penal Farm, 90 sa Zamboanga Prison and Penal Farm, 80 sa Sablayan Prison and Penal Farm, at 83 sa Leyte Prison and Penal Farm. Ang papel ng bawat opisyal ay magiging kritikal sa pagpapanatili ng kaayusan at seguridad sa loob ng mga institusyong ito.

Sa kanyang talumpati, sinabi ni Catapang ang kahalagahan ng integridad at pagbabantay . Aniya, walang opisyal ang dapat magbulag-bulagan sa mga pagkakamali, lalo na mula sa mga kapwa tauhan kung saan ang pagtatrabaho sa Bucor ay isang sakripisyo dahil ipinaglalaban nito ang dignidad at disiplina.

Sa isang hakbang upang mapabuti ang kapakanan ng mga tauhan ng Bucor, inihayag ni Catapang ang mga bagong inisyatibo sa pabahay sa pakikipagtulungan sa mga ahensya ng gobyerno tulad ng PAG-IBIG. Hinikayat niya ang mga recruit na unahin ang pagmamay-ari ng bahay kaysa sa pagkuha ng maraming pautang.

Binigyang-diin ni Catapang na sanayin ang mga babaeng trainers upang ang mga babaeng rekrut ay makatanggap ng gabay mula sa mga babaeng opisyal, na magtataguyod ng isang suportadong kapaligiran para sa lahat. (JOJO SADIWA)