Mayor Baste pinatawag ng Impeachment Court… ‘GENCORP DEALSNI VP SARA MAY CONFLICT OF INTEREST’

NAGBABALA si House impeachment team adviser at spokesperson Ace Barbers tungkol sa posibleng “conflict of interest” sa mga transaksyon ng Davao City government sa Gencorp Industries Inc., isang kumpanyang sinasabing idineklara ni Vice President Sara Z. Duterte bilang bahagi ng kanyang interes sa negosyo.

Ayon kay Barbers, kailangang maipaliwanag ang mga naturang transaksyon habang pinalalawak ng mga prosecutor ng Kamara ang kanilang Article II case laban kay Duterte—mula sa kanyang Statements of Assets, Liabilities and Net Worth (SALNs) hanggang sa mga corporate at government records.

“There is a clear conflict of interest from the surface, alam mo na merong conflict of interest,” ani Barbers.

Lumutang ang isyu habang inihahanda ng mga prosecutor ang mga rekord kaugnay ng mga idineklarang business interests ni Duterte at ang naging transaksyon ng mga ito sa mga ahensya ng gobyerno.

Kabilang ang Gencorp sa mga kumpanyang lumilitaw sa mga SALN ni Duterte. Isang opisyal ng Ombudsman na naunang tumestigo sa impeachment trial ang nagtukoy sa Gencorp bilang isa sa business interests at financial connections na idineklara ng Bise Presidente.

Ngayon, inaalam ng mga prosecutor kung nakipagtransaksyon ang Gencorp sa Davao City government at, kung mayroon man, kung ano ang uri at halaga ng mga naturang transaksyon.

Batay sa mga ulat na iniharap ng prosecution, umabot sa tinatayang P14.32 milyon ang mga sinasabing transaksyon ng Gencorp sa Davao City government mula 2022 hanggang 2025.

Bahagi ito ng tinatayang P15.02 milyon na kabuuang government transactions na sinasabing kinasasangkutan ng kumpanya, kabilang ang P696,829 mula sa PhilHealth regional office sa Davao.

Naganap ang mga transaksyon sa Davao City habang alkalde si Sebastian “Baste” Duterte at Bise Presidente ang kanyang kapatid na si Sara.

Sinabi ni Barbers na ito ang dahilan kung bakit dapat busisiin ang mga detalye sa likod ng mga transaksyon.

“At dapat matanong kung ano ba itong kontrata na ito. At bakit Gencorp ang nakakuha ng kontrata na very clear sa dokumento ng korporasyong ito na ang nagmamay-ari umano ay si Pangalawang Pangulong Sara Duterte,” ani Barbers.

Iniutos na ng Senate Impeachment Court ang pagpapalabas ng subpoena kay Mayor Baste bilang bahagi ng presentasyon ng prosecution sa Article II.

Inaatasan siya ng subpoena na tumestigo at magsumite rin ng mga rekord at kontrata ng Davao City government mula 2020 pataas na may kaugnayan sa Gencorp at iba pang tinukoy na business transactions.

Ayon sa prosecution, ipinapatawag si Mayor Baste dahil maaaring mayroon siyang mahalagang personal at opisyal na kaalaman hinggil sa mga sinasabing transaksyon—at hindi lamang dahil kapatid siya ng Bise Presidente.

Siya ay ipinapatawag bilang testigo at hindi respondent sa impeachment case.

Orihinal na itinakda ang kanyang pagharap sa Senado sa Setyembre 23, ngunit sinabi ni Presiding Officer Sen. Francis “Chiz” Escudero na maaaring bawiin at muling ilabas ang subpoena para sa ibang petsa depende sa takbo ng testimonya ng mga naunang saksi at sa mga pagdinig ng korte kaugnay ng pinagtatalunang conviction threshold.

Bahagi ang mga transaksyon ng Gencorp sa mas malawak na pagsusuri sa ilalim ng Article II kung ang idineklarang yaman at business interests ni Duterte ay naaayon sa kanyang lehitimong kita, corporate holdings at iba pang financial records.

Sinimulan ng prosecution ang pagsusuri sa kanyang mga SALN at ngayon ay tinututukan na rin ang mga corporate, procurement, tax, bank at iba pang government records bilang bahagi ng pagbuo ng kaso kaugnay ng umano’y unexplained wealth.