Mas maraming Pinoy swak sa digital economy dahil sa mababang presyo ng GCash IPO – Rep. Padiernos

ANG final price na P6.60 bawat share ng Initial Public Offering (IPO) ng Mynt Inc. ay maaaring magbukas ng pagkakataon para sa mas maraming Pilipino na maging bahagi ng pagmamay-ari ng isa sa higanteng digital platforms sa bansa, ayon kay Rep. JP Padiernos.

“Sa presyong P6.60 bawat share ay mas nagiging abot-kamay para sa mga ordinaryong Pilipino ang paglahok sa digital economy ng bansa. Hindi lamang ito tungkol sa pagbili ng shares, kundi nagbibigay pa ito ng pagkakataon sa mas marami nating kababayan na maging bahagi ng pagmamay-ari at paglago ng isang homegrown digital enterprise,” ani Padiernos, miyembro ng House panel on banks and financial intermediaries.

Sa halagang P6.60 bawat share, kailangan lamang ng P660 ng isang investor para makabili ng 100 shares, bago ang kaukulang fees at charges. Mas mababa ito kumpara sa dating itinakdang P10 maximum offer price ng IPO.

Maaari rin nitong gawing mas madali para sa mga first-time investor ang pagpasok sa stock market, lalo na’t inaasahang magiging available ang GCash shares sa pamamagitan ng GStocks sa GCash app, habang ang mga kuwalipikadong Local Small Investors ay maaaring mag-subscribe sa pamamagitan ng PSE EASy platform ng Philippine Stock Exchange.

“Mas malawak ang kahulugan ng IPO na ito kaysa sa halagang malilikom na kapital. Kung ang mga Pilipinong bahagi na ng digital economy ay maaari ring maging investors dito, mas napapalawak natin ang partisipasyon sa ating capital market at napapalakas ang kultura ng pamumuhunan ng ating mga kababayan,” diin ni Padiernos.

Nangyayari ito habang lalong nagiging bahagi ng pang-araw-araw na buhay ng mga Pilipino ang digital financial services, kung saan nag-aalok ang GCash ng payments, savings, credit, investment at iba pang serbisyong pinansyal sa pamamagitan ng platform nito.

Maaari ring magsilbi ang IPO bilang karagdagang daan para makapasok ang mas maraming Pilipino sa capital market, partikular ang mga first-time investor na maaaring dati nang nag-aakalang ang pagmamay-ari ng stocks ay para lamang sa mga batikan o mas may kakayahang pinansyal.

“Dapat nating tanggapin ang mga hakbang na naglalapit ng lehitimong investment opportunities sa ordinaryong Pilipino, ngunit kailangan din nating paalalahanan ang publiko na ang pamumuhunan ay nangangailangan ng sapat na kaalaman at maingat na pagpapasya. Ang pagiging accessible ng investments ay dapat kaakibat ng investor education at protection,” dagdag niya.

Maaari rin nitong higit na pag-ugnayin ang mabilis na paglago ng digital economy at capital markets ng bansa, dahil mabibigyan ang mas malawak na hanay ng Filipino investors ng pagkakataong maging bahagi ng pagmamay-ari ng isang malaking homegrown technology at financial-services company.

Para sa mambabatas mula Nueva Ecija, hindi lamang ang paglista ng isa pang malaking kumpanya sa Philippine Stock Exchange ang mas malawak na kabuluhan ng offering, kundi ang posibilidad na mailapit sa ordinaryong Filipino investors ang pagmamay-ari ng isang mahalagang bahagi ng digital economy ng bansa.

“Ang tunay na sukatan ng financial inclusion ay hindi lamang kung may access ang mga Pilipino sa digital financial services, kundi kung maaari rin silang makilahok nang makabuluhan sa mga oportunidad na nililikha ng digital economy. Maaaring buksan ng IPO na ito ang usaping ito para sa milyon-milyon pang Pilipino,” aniya.