PALASYO ‘OKEY’ SA MAPAYAPANG PAGSUKO NI BATO!

BUKAS ang Malakanyang sa posibleng pakikipag-usap sa Senate minority para sa mapayapang pagsuko ni Senador Ronald “Bato” dela Rosa.

Sinabi ni Palace Press Officer Usec. Claire Castro, hindi nila isinasara ang posibilidad ng negosasyon, pero nais muna nilang malaman ang nalalaman ng mga kaalyado ng senador tungkol sa kanyang sitwasyon.

Kabilang dito kung alam ng Senate minority kung nasaan si Dela Rosa, kung sino ang nagtatago sa kaniya at kung nakakausap pa nila ang mambabatas.

Kung may sapat na impormasyon ang mga senador, maaari umanong pag-usapan ang posibleng negosasyon upang maiwasan ang puwersahang pag-aresto kay Dela Rosa.

Mas mainam din, ayon kay Castro, kung ang mga kapwa senador mismo ang hihikayat kay Dela Rosa na sumuko na at wakasan ang pagtatago.