SENATE, INC.

MATIWASAY na natapos ang bilangan ng boto sa pagka senador sa katatapos na halalan. Nadeklara na ang 12 senador na mapalad na nakatawid sa finish line at magkakaroon ng pribilehiyo na maglingkod sa bayan sa pamamagitan ng pag-akda ng mga batas. Masasabing ibang uri ng senado ang papasok sa 19th congress dahil karamihan sa mga uupo’y hindi mga abogado at hindi bihasa sa paggawa ng batas. Karaniwan sa mga halal na senador, makikita ang kasanayan ng Pinoy na mamili ng sikat at kilalang personalidad ngunit mababa ang kalidad o uri ng karanasan sa paglalatag ng mga panukalang batas. Mukhang ang kinatawan na pinili ng karaniwang Pinoy ay ang lalapitan sa oras ng pangangailangan at hindi mambabatas. Iba ang galaw ng mga kinatawan na lilikha ng batas at ang mga taong lalapitan sa oras ng pangangailangan, batid mo ba ito Mang Juan? Hindi minamaliit ang mga kakayahan ng mga bagong halal na mga senador, mga dati at mga nagbabalik sa senado. Subalit ang inaasahang talastasan sa mga panukalang batas lalo sa panahon na kailangang masuri ng masinsin ang mga ihahaing panukala’y maaring makalusot sa kongreso ng ‘ di maayos ang pagbubusisi.

Sa darating na 19th Congress, mapapansin na halos hindi magkakaiba ang mga pangalan ng mga senador na lilikha ng batas, nariyan ang mag-ina, mga magkapatid, mga magkakasama sa industriya ng showbiz, kapanalig ng bababang pangulo at maging ang kapatid ng presumptive president. Sa larawang ito ng mataas na kapulungan, lalakas ang boses ng silent majority at malamang na dadami ang maghahain ng mga panukalang batas na magbibigay daan sa kaunlaran ng iilan at nang ‘di nakakarami. Asahan ang umaatikabong palitan ng hikab at tulog kung paano palalakasin ang kanya-kanyang economic status upang may magamit sa susunod na halalan. Asahan ang makalaglag panting panukala na magbibigay daan sa pagpapalakas ng agrikultura at maghanda ang mga nakatungali dahil pawang mapagtanim ang napunta sa senado. Napaka halaga ng ambag ng bawat isa sa kabuhayan ng bawat kasapi ng kapulungan. At kung papalarin, isang tulad ni Janet Napoles o mismong ito’y makababalik na upang muling mangusap sa mga nagbabalikang senador. Dahil kailangan ng isang tulad nito na marunong mamili kung sino ang papangalanan.

Sa lagay na ito ng senado, na marami ang kapanalig ni Boy Pektus at Inday Sapak na isang magandang pangitain dahil bibilis ang pagpasa ng mga panukalang batas na kailangan sa pag-ulad ng bayan. Walang mabusising talastasan sa mga batas na makakatulong sa pag-unlad na kailangan upang maisagawa ang programa ng may kabilisan. Ang kagalingan sa pagbusisi’y gagawin na lang sa hanay ng magpapanukala, halimbawa ang ehekutibo. At ito ang nais ng 31M bumoto kay Boy Pektus, ang mabilis na programa na darating sa kanila at hindi ang batas na kailangan pang ipagtangol sa hukuman. Paparating na ang panahon na ang pagpapatupad muna at saka na ang pagpapaliwanag. Ang mabilis na serbisyo ang kailangan at dapat. Ang pakikiisa ng kongreso sa nais ng ehekutibo na ayon sa pangangailangan ng bayan ang bibigyan pansin, walang kuskos balungos. Heto ka, malinaw na ang pagkakaisa ang uunahin at ito’y parang larawan ng bumubuo ng bagong senado na magkakadugo, magkakaibigan, magkakakuntsaba, ito ang Senate, Inc.

Ang tayong ito ng senado ay tila sinasangayunan ng pagkakataon ang presumptive administration ni Boy Pektus na maipatupad ang nais ng walang aberya. Hawak ng mayorya ng senador mula sa dadatnan at mga papasok na senador ang dami ng bilang, walang lusot ang mga panukalang batas na ihahain nito. Ang tanong, madali ang pagpapalusot ng mga panukalang batas ngunit may saysay ba ito sa buhay ng karaniwang tao. Batid ng bayan kung paano pinili ng COMELEC este ng nakararami ang mga nahalal. Lubhang gumana ang troll army ni BP.

Muli sa larawan ng mga tatao o uupo sa senado, makikita na magiging maganda ang kahihinatnan ng bayan sa darating na panahon. Magiging madali ang pagpasa ng batas kung ang isa sa mga senador lalo anak o kapatid ang magpapanukala. Ang pangangailangan ng bayan ay tiyak na huli sa pansariling kapakanan ng sarili o pamilya. Walang sisinuhin dahil kapakanan o kinabukasan ng pamilya ang prayoridad ng masiguro na sa susunod na takbuhan mahahalal ang isa pang kapamilya. Mananatiling pangako ang mga binitawan noong kampanyahan, at umasa na aatras ang kabuhayan ng mamamayan. Hintayin ang pagbaba ng mga bilihin higit ng bigas na aangkatin sa kalapit bansa. At malamang hindi na magsasaka ang mga magbubukid sa halip magiging entrepreneur ang mga ito na malayo sa kanilang kinagisnan. Bakit kamo, ang murang bigas na aangkatin sa kalapit na bansa ang ibebenta sa merkado. Mababa ang halaga ng pag-aangkat sa halip na magtanim. Saan ka pa, hayahay ang buhay ng mga magbubukid.

Sa pagtigil ng pagtatanim ng mga magbubukid, malamang dadami ang mga maglalakihang sub-division na pag-aari ng ilang magkamag anak na senador. Dito titira ang mga magsasaka habang ang mga mahal sa buhay ang magkaroon ng trabaho sa ibang bansa. Ang lilikhaing trabaho ang isa sa pangako na nabangit kaya’t umasa na ang paglago ng bilang ng OFW. Asahan sa darating na panahon, hindi na masisilayan ang dating mga barong barong na kabahayan dahil papalitan ito ng mga konkretong kabahayan na kasing gara ng mga nasa kalunsuran. Kabahayan o sub-division na may mga palaruan, mula basketbolan, swmming pool at ibang pasilidad sa kasisiyahan ng maninirahan. Subalit wala na ang inyong sakahan at barong barong na labas pasok ang sariwang hangin na nagpapahaba ng inyong buhay. At malamang, kailangang maghanda ng salapi upang ipambayad sa upa o pambili ng bago ninyong tahanan. Di bale lumabas na ng bansa ang marami sa mahal sa buhay upang maghanap buhay.

Naisalarawan ang nasa itaas sa kadahilanang ang bumubuo ng senado’y tunay na magkakadugo at ito ang nais ng nakakaraming Pilipino. Umaasa ng mabilis na aksyon sa mga panukalang batas na maglalagay sa kagalingang pampamilya ng mga senador. Saka na ang bayan kung na plantsa na ang para sa pamilya. Kailangang lunukin ng maraming Pilipino ang maling pagluluklok sa magkakapamilyang politiko na batid naman ang hangarin. Hindi ipinilit na mailagay sa pwesto sa halip ang hindi paggamit ng maraming Pilipino sa kanilang isip ang nagseselyo sa yaman ng mga ito. Kay Mang Juan, gamitin ang pandama at isip sa pagdedesisyon para sa bayan, huwag unahin ang panandaliang pakinabang. At sa ngayon ito ang babalikatin ng bawat Pilipino sa loob ng tatlo o hangang anim na taon, ang Senate, Incorporated.

Maraming Salamat po!!!