Dambuhalang lapu-lapu nahuli sa Antique

Viral ang malaking lapu-lapu na nahuli ng isang mangingisda sa karagatan ng Barangay Idio sa Sebaste, Antique nitong Linggo, Hunyo 26.

Ayon sa nag-post na si Reah Davidson, may timbang na 187 kilo ang nahuli ng kanyang pamangking mangingisda na si Rex Vego.

Dahil sa bigat nitong halos 200 kilo, pahirapan para kay Rex na mahuli ang nasabing isda kung kaya naman nangailangan na siya ng tulong mula sa iba pa niyang kasamahan.

Inabot umano ng halos limang oras bago naiangat ng mga ito ang lambat at laking gulat nila nang makita ang higanteng lapu-lapu na wala nang buhay.

Ayon kay Reah, itinuturing nilang biyaya mula sa dagat ang nasabing huli ng kanyang pamangkin.