Advertisers

Advertisers

Negosyo sa face mask

0 1,028

Advertisers

MAHIGIT 1M Pilipino na ang nagkaroon ng C-19 at libo-libo ang pumanaw sa sakit na ito na hindi dapat mangyari kung maagang kumilos ang tamad at walang alam na pamahalaan ni Totoy Kulambo. Sa kapabayaan at kawalan ng balangkas sa pagsugpo sa pandemyang dumayo sa bansa mula sa mga kaibigan ni TK na intsik, masakit tanggapin na isisi kay Mang Juan ang pandemyang dinaranas ng bansa.

Sa totoo lang, hinayaan ang mga dayong intsik na pumasok ng bansa kahit batid na ng mundo na galing ang pandemya sa Wuhan, isang lungsod sa Tsina. Takot si TK na magtampo si XI at hindi magpaabot ng proyekto na pagkaperahan ng iilan sa pamahalaan. Sa pagpapabaya dumami ang may sakit at nangamatay ang mga anak ni Mang Juan.

Pangalawa, ang hindi tamang hakbang na ipinatupad tulad ng paglalagay ng sundalo at pulis sa mga choke points at pagiikot, sa halip na mga health workers, ang dahilan ng pagpapatuloy ng pagdami ng may C19. At heto nakapasok na sa bansa ang mga variants na ‘di malaman kung paano pipigilan. Ay naku, tinamaan tayo ng walang kasing malas mula ng maupo si Totoy Kulambo sa puno ng Balite sa Malacanan.



Sa karagdagan, hindi kakayanin ni Mang Juan ang mga bayaring inutang ng pamahalaan na dapat ipantutustos kontra pandemya, tulad ng pondo sa pagbibigay ng bakuna para masugpo ang pandemya. Ngunit hanggang sa kasalukuya’y hindi nakakapagsara ang pamahalaan ng mga order sa mga kumpanyang gumagawa ng bakuna dahil sa maraming kadahilanang hindi masagot ng pamahalaan.

Bilang pagbibigay diin, pawang mga donasyon ang mga dumadating na mga bakuna sa bansa at walang gastos dito, libre ang mga ito. Kaya Mang Juan maging mapagbantay sa mga bakunang dumarating sa bansa at baka ma joke na naman tayo at biglang mawala ang pondo na inutang na bayarin…

Malinaw na hindi nagtatapos ang kalbaryo ni Mang Juan sa pagpasan sa mga bayarin at mga walang kwentang patakaran. Nariyan nakaabang ang mga batas galing sa mga LGUs na isa na namang pasanin na talagang ayaw bigyan ng pagkakataon si Mang Juan upang makapagpahinga sa lahat ng uri ng sakit. Binanggit ni Totoy Kulambo na hulihin ang mga hindi nakasuot at maling pagsusuot ng face mask. Maraming mga LGUs ang tumalima sa kautusan, at sinusugan ito ng bagong hepe ng PNP, subalit silipin natin ang nasa Lungsod Quezon kung paano ito ipinatutupad.

Silipin ang lunsod ni Joy “Lulubog Lilitaw” Belmonte. May batas na ipinasa ang Sangguniang Panlungsod na nagtatakda ng bayarin sa mga mahuhuling lumalabag sa hindi pagsusuot o maling pagsusuot ng face mask. Malinaw na bayarin ang usapin sa SP-2957, s.2020, kung saan Php300 ang ipapataw sa unang paglabag, Php500 at Php1,000 sa pangalawa at pangatlong paglabag. Bakit kailangan bayarin ang parusa gayong sa hirap ng buhay na halos walang makain ang mga anak ni Mang Juan, ang paglalabas pa ng halagang mga nabangit ang kaparusahan. Tila ‘di batid ng konseho ng QC, o ni Lulubog Lilitaw Belmonte na lubhang masakit sa bulsa ang paglalabas pa ng halaga na sana’y para na sa pagkain. Hindi pumasok sa isip ng mga namamahala ng lungsod na sa halip na bayarin ang parusa bakit hindi bigyan pansin ang pagbibigay serbisyo sa lugar na kanilang tinutuluyan. Ang paglilinis o pagwawalis ba ng pamayanan o kakalsadaha’y ‘di magandang kaparusahan?

Ang pagpipintura ng mga sidewalk ay hindi sapat? Ang paglilinis ng mga barangay hall ay kulang? Ang pagbibigay ng punto sa ordinansa at kaligtasan ng mamamayan ay di ganap. O sadyang ubos na ba ang pondo ng lungsod at ginawang income generating ordinance ang kaparusahan sa paglabag sa ordinasyang ito? Sadyang matakaw sa salapi si Lulubog Lilitaw at ito ang kailangan. Lubhang nakakalungkot na pinamumunuan ang lungsod ng walang pusong tao at ang tanging paraan ng disiplina ang kaperahan.

Bigyan natin ng ilang kaganapan sa baba ang negosyo este ordinansa sa pagsusuot ng face mask. Isang insidente kung saan natikitan ng Mamang Pulis ang isang anak ni Mang Juan na nasa baba ang maskara. Sa halip na sabihing ayusin ang pagsusuot, alang patawad at agad tinikitan habang tinanong ang ibang mga impormasyon sa pagkatao nito, na lubha kinatakot. Bakit kailangan alamin ang ibang impormasyon gayung ang pagsusuot lang ng face mask ang usapin.



Ano may interogasyon na kasama ang panghuhuli? Pangalawa, muli ang anak ni Mang Juan ang napagdiskitahan ng Mamang Pulis at sinita sa ibang dahilan, walang suot na helmet habang nagmamaneho ng motor. Sa kawalan ng paniket para sa paglabag sa pagmamaneho ng walang helmet, binigyan ito ng tiket para sa maling pagsusuot ng facemask gayung maayos ang kanyang pagsusuot ng face mask, ano ito kalokohan? Ang tanong may Quota ba ang mga manghuhuli sa negosyong este sa ordinasiyang ito? Alam ng tsuper ng motorsiklo na mayroong paglabag, subalit hindi tama na bigyan kaparusahan o penalty sa isang kamaliang hindi naman nagawa. Hindi nagagamot ng mali ang isang mali.

Ang pagsunod sa utos ni Totoy Kulambo’y tama, subalit ang pagbibigay ng tamang kaparusahan ang mas mainam. Hindi kailangan na agawan pa ng pantustos ang mga anak ni Mang Juan upang ipatupad ang utos, ang mag-alay serbisyo para sa bayan kahit sa ilang oras ay sapat na upang matuto ito sa pagkakamali. Hindi napipigil ng parusang bayad pera upang pasunurin ang mga Pilipino sa mga batas na sila naman ang gustong pangalagaan.

At kita ang maraming paglabag sa lokal na pamahalaan na hindi rin ipinatutupad ang social distancing sa pila sa pagbabayad sa binigay na tiket sa maling pagsusuot ng face mask. Ang unahin ang pera sa halip na pagtuturo sa pagtatama ng kamalian ang siyang maling hakbang sa pagpapasunod sa batas. Ang ganitong uri ng kaparusahan ay pumapabor lamang sa mayayaman at hindi sa mahihirap. Patas ba ang pagpapatupad ng ordinansa sa mayayamang pamayanan sa Lungsod, nagtatanong po? Baka gusto ninyong iayos ang batas na ito?

Maraming Salamat po!!!