Pharmally president Dargani pinalaya na ng Senado

PINAYAGAN nang makalaya sa Senado si Pharmally Pharmaceutical Corporation president Twinkle Dargani matapos makulong nang ilang buwan dahil sa contempt.

Una rito, Lunes ng gabi nang aprubahan ni Senate President Vicente Sotto III ang release form ni Dargani dahil sa umano’y lumalalang ‘mental health condition’ nito.

Nagpositibo rin si Dargani sa COVID-19 habang nananatili sa Senado, na naka-lockdown hanggang Enero 16.

Kinumpirma naman ni Senate Sergeant-at-Arms Ret. Gen. Rene Samonte na pinalaya dakong 12:15 ng madaling-araw si Dargani sa kondisyong dadalo ito sa mga pagdinig sakaling ipatawag ng Senado.

Dumiretso si Twinkle sa bahay ng kanyang ina na si Deepa Dargani sa Bonifacio Global City sa Taguig.

“Yes, [she] was released at 12:15 a.m… to be with her mother, with the understanding that she will be available when needed by the Senate. I was told they will proceed to the residence in [Bonifacio Global City], to complete her isolation and quarantine,” wika ni Samonte sa text message.

Samantala, nanatili namang nakakulong sa Pasay City Jail ang kapatid nitong si Mohit Dargani na isinasangkot sa maanomalyang transaksiyon ng gobyerno sa pagbili ng mga PPEs sa kumpanyang Pharmally kasama ang direktor ng Pharmally na si Linconn Ong. (Mylene Alfonso)