PH B.E.S.T. BETS WHITE AT MOJDEH PASIKLAB SA DUBAI SWIMFEST

UMEKSENA ang Filipino-British swimming protégé na si Heather White nang pangunahan ang impresibong kampanya ng five-man Swim League Philippines-Behrouz Elite Swimming Team sa pagsisimula ng 2022 Middle East Open and Junior Swimming Championships nitong weekend sa Dubai, United Arab Emirates.

Humirit ang 14-anyos na si White sa girls 12&over 100-meter butterfly sa tyempong 1:04:60 kontra sa junior standout mula sa powerhouse England, United States, Japan, China, Australia, Brazil, Canada, South Korea, Germany at Norway.

Mula sa mahabang pagsasanay sa abroad bilang paghahanda sa pagsabak sa Philippine Swimming Inc. (PSI) National Championship sa Pebrero 25-27 – bahagi ng tryouts para sa binubuong National Team para sa Southeast Asian Games sa Hanoi, Vietnam – nagparamdam ng kahandaan si White na sumungkit din ng dalawang silver medal sa 50-meter butterfly at 100-meter freestyle at bronze sa 50-meter backstroke.

Naisumite ni White ang oras na 29.57 segundo sa 50-meter fly, habang nakuha ang tyempong 1:00.70 sa 100-m free, bago ang ikatlong puwestong pagtatapos sa 50-m back sa oras na 32.74.

“We’re very elated with the performance of our swimmers. Against the best junior standout from Europe, pinatunayan ng atleta natin na kayang makipag-sabayan,” pahayag ni Joan Mojdeh, SLP-BEST team manager.

Laban sa mga 16-anyos na karibal, nagawang makapasok ni Philippine Junior record holder Micaela Jasmine Mojdeh sa women’s open class finals ng 100-m butterfly at 200m-butterfly, ngunit nabigo ang multi-titled internationalist na makatungtong sa podium.

“Malaking adjustment pa ang ginagawa ni Jasmine. Sa 16 and over class na siya lumalangoy kaya mahirap ang laban sa Finals lalo na at puro European ang kalaban,” sambit ni Mojdeh.

Nakalinya pang lumangoy ang 15-anyos na si Mojdeh sa women’s 50 meters butterfly, 400m individual medley (IM) at 200m breaststroke events.

Sa junior 10 and over class, nagwagi ng silver si Hannah White sa girls 100-meter free style sa tyempong 1:16.15 at sa 50-meter fly (39.32), habang nakakuha ng bronze medal ang nakababatang kapatid ni Jasmine na si Behrouz Mojdeh sa boys 50-meter butterfly sa oras na 34.98.(Danny Simon)