Mga estudyante sa iskul sa Bulacan, nagkakasakit sa sobrang init ng panahon

Nagkaubusan ng paracetamol sa isang eskuwelahan sa Malolos, Bulacan, nang makaranas ang maraming estudyante ng pagkahilo o pananakit ng ulo dahil sa init ng panahon.

Sa ulat, ilang estudyante rin sa Malolos Integrated School-Catmon Campus ang isinugod sa ospital dahil sa hirap sa paghinga.

Doble-dobleng electric fan na ang ginagamit para maibsan ang init sa mga silid-aralan, at binago na ang mga oras ng klase.

Inabisuhan din ang mga guro at estudyante na uminom ng tubig para maiwasan ang heat stroke.