‘ICC WALANG JURISDICTION SA PH MULA PA NOONG 2019’

MALINAW na walang hurisdiksiyon ang International Criminal Court (ICC) para magsagawa ng imbestigasyon sa illegal drug campaign ni dating Pangulong Rodrigo Duterte.

Ito ang binigyang diin ni Senior Justice Undersecretary Raul Vasquez sa isang news forum sa Quezon City na inorganisa ng Presidential Communications Office (PCO).

Ayon kay Vasquez, mula noong 2019 ay wala nang hurisdiksiyon sa Pilipinas ang ICC.

Aniya, gumagana naman ang judicial system sa bansa kaya hindi ito dapat panghimasukan ng criminal court na nakabase sa ibayong dagat.

Samantala, iginiit naman ng isang abogado na maaaring dumirekta sa ICC ang pamilya ng mga biktima ng ‘war on drugs’ para magsumite ng kanilang mga ebidensya.

Ang pahayag ay ginawa ni Atty. Kristina Conti, ICC assistant to counsel at secretary general ng National Union of Peoples’ Lawyers-National Capital Region, makaraang tumanggi ang gobyerno ng Pilipinas na makipagtulungan sa muling pagbubukas ng imbestigasyon.

Sinabi ni Conti na inaasahan niya na may mga hawak na kopya ng police at SOCO reports ang pamilya ng mga biktima na maaari nilang dalhin sa ICC.

Nasa 7,000 dokumento ang una nang isinumite ng Philippine National Police (PNP) na may kaugnayan sa mga nakabinbin na kaso sa Supreme Court sa isyu ng Oplan Tokhang. (Gilbert Perdez)