MARCOS NAGTALAGA NG JBC MEMBER, IBA PANG GOV’T EXECS

ITINALAGA ni Pangulong Ferdinand Marcos Jr. si retired Court of Tax Appeals (CTA) Associate Justice Erlinda Piñera Uy bilang bagong miyembro ng Judicial and Bar Council (JBC).

Batay sa appointment paper na nilagdaan ni PBBM, papalitan ni Uy si Atty. Franklin Demonteverde na napaso ang termino noon pang Hulyo 9.

Si Uy ay magiging kinatawan ng Integrated Bar of the Philippines (IBP) sa JBC. Manunungkulan si Uy hanggang Hulyo 9,2027 sa council na siyang naatasang sumala ng mga aplikante sa hudikatura.

Makakasama naman ni Uy sa lupon si Chief Justice Alexander Gesmundo na nagsisilbi bilang ex-officio chairperson.

Maliban kina Uy at Gesmundo, kabilang naman sa mga incumbent members ng council sina Justice Secretary Jesus Crispin Remulla, ex-officio member; Sen. Francis Tolentino, Congress; Nesauro Firme, academe; ex-SC Justice Jose Catral Mendoza, retired SC justices; at Toribio Ilao Jr., private sector.

Samantala, iniluklok ni PBBM si Converge ICT Solutions Inc. chief executive officer Dennis Anthony Uy bilang ‘special envoy to Korea for digital transformation’ habang inilagay naman si Francisco Gabriel Remulla bilang miyembro ng Sangguniang Panlalawigan ng Cavite.

Si Janice Castellano ay in-appoint ni Macos bilang Director II ng Department of Information and Communications Technology (DICT) habang ipinuwesto naman si Al Perreras bilang Deputy Director-General ng Bureau of Corrections (BuCor). (Gilbert Perdez)