Destabilization plot sa Marcos admin itinanggi ng AFP at PNP

MARIIN na pinabulaanan ng Armed Forces of the Philippines (AFP) na mayroong “destabilization plot” laban sa kasalukuyang administrasyon ni Pangulong Ferdinand “Bong Bong” Marcos, Jr.

Ayon kay Colonel Medel Aguilar, misquoted lang si AFP Chief of Staff, General Romeo Brawner Jr., sa kanyang mensahe sa mga sundalo nang magtalumpati sa isinagawang ‘Change of Command’ ceremony sa Western Mindanao Command nitong Nobyembre 3, 2023.

Aniya, binanggit lang ni Brawner na mayroon ilang individual na hindi kuntento at nagtatangka guluhin ang tinatamasang kapayapaan at katatagan ng bansa sa ilalim ng administration ni Pangulong Marcos.

Sinabi ni Aguilar na pinaalalahanan lang ni Brawner ang mga sundalo na manatiling professional at maging tapat sa kanilang sinumpaan tungkulin na protektahan ang sambayanan at bansa.

Kaugnay nito, sinabi ni PNP Chief, General Benjamin Acorda Jr., walang nakikitang anuman dahilan ng banta sa seguridad o destabilization sa kasalukuyang administrasyon.

“For us, sa PNP side, wala tayong nakikita and we are very much confident the government is very stable,” pahayag ni Acorda.

Aniya, patuloy ang kanilang pagmo-monitor, but on the part of the PNP we are 100 percent in full support naman sa ating administration sa government and don’t see any reason for destabilization. (Mark Obleada)