Dismissed Police Major sa missing beauty queen bantay-sarado

HINDI makaaalis ng bansa si dismissed Police Major Allan De Castro, pangunahing suspek sa pagkawala ng beauty pageant contestant na si Catherine Camilon, ayon sa PNP-Criminal Investigation and Detection Group (CIDG) nitong Martes.

Sinibak sa serbisyo si De Castro at pinalaya mula sa restrictive custody sa Camp Vicente Lim noong January 16, 2024.

“We already have a coordination with the Bureau of Immigration na because we are anticipating that maybe aalis siya ng bansa, we made already coordination for hold departure order para hindi makalabas ng bansa itong main suspect natin,” pahayag ni CIDG director Major Gen. Romeo Caramat Jr.

“I think once na lumabas ng bansa o tumakas…that’s already guilt on his part, so I don’t think na gagawin niya, but who knows,” dagdag niya.

Inihayag ni Caramat na ginagawa ng CIDG ang makakaya nito na ma-convict sina De Castro, kanyang driver na si Jeffrey Magpantay, at dalawang “John Does” sa kasong kinahaharap nila. Aniya, umaasa siyang aaminin din ni Magpantay ang kanyang “participation on the disappearance of Miss Camilon.”

“We are still hoping that we could win case, we could secure a conviction against the suspects because sa administrative case ng suspect natin meron na tayong substantial evidence for his participation and it will depend upon the appreciation of the court holding this case.”

Nawawala si Camilon mula pa October 12, 2023.