No. 4 top most wanted person ng NPD, huli sa Rizal

TIMBOG ang No. 4 top most wanted person ng Northern Police District (NPD) sa isinagawang manhunt operation ng mga tauhan ng Valenzuela Police sa Teresa, Rizal, Sabado ng hapon.

Sa ulat kay NPD Director P/BGen. Rizalito Gapas, sinabi ni Valenzuela Police Chief P/Col. Salvador Destura Jr., nakatanggap ng impormasyon ang Station Intelligence Section (SIS) hinggil sa kinaroroonan ng akusadong si alyas “Joemark”, 28, driver.

Ikinasa ang manhunt operation na nagresulta sa pagkakaaresto sa akusado ala-1:00 ng hapon sa Blk. 38, Lot 2, Carissa Homes East 2, Barangay Dalig, Teresa, Rizal.

Inaresto ang akusado sa bisa ng warrant of arrest na inisyu ni Presiding Judge Evangeline S. Mendoza-Francisco ng Regional Trial Court Branch 270, Valenzuela City noong September 17, 2021, para sa kasong Rape (RPC Art. 266-A) in rel. to R.A. 7610 – Child Abuse Law (2 counts).

Pansamantalang nakapiit ang akusado sa custodial facility unit ng Valenzuela Police habang hinihintay ang pagpapalabas ng commitment order ng korte.(Beth Samson)