MARCOS NAKIKIDALAMHATI SA PAGPANAW NG IRANIAN PRESIDENT

NAGPAHAYAG si Pangulong Ferdinand Marcos Jr. ng kanyang taos-pusong pakikiramay sa mga mamamayan at pamahalaan ng Islamic Republic of Iran matapos ang malagim na helicopter crash na ikinasawi nina Pangulong Ebrahim Raisi, Foreign Minister Hossein Amir Abdollahian, at kanilang mga kasama.

Sa kanyang statement sa social media, ipinaabot ni Pangulong Marcos ang kanyang malalim na pakikisimpatiya para sa bansang Iran, lalo na sa mga pamilyang naulila at mga mahal sa buhay ng yumaong Pangulo at ministro ng ugnayang panlabas.

“We offer our deepest condolences to the people and the government of the Islamic Republic of Iran, especially to the families and loved ones of the late President Ebrahim Raisi, Foreign Minister Hossein Amir Abdollahian, and their companions in this tragic incident,” wika ni PBBM.

Maliban dito, nagpaabot din si Pangulong Marcos ng pakikiisa at panalangin ng mga Pilipino sa mga mamamayan ng Iran sa panahon ng kanilang pagluluksa.

“The Filipino people mourn with you and will keep you in our prayers during this difficult time,” dagdag pa ni Pangulong Marcos.

Nabatid na bumagsak ang helicopter na sinasakyan ni Raisi malapit sa lungsod ng Jolfa, na may distansiyang halos 600 kilometro mula sa Tehran, ang kabisera ng Iran, kung saan bukod sa presidente ng Iran ay nasawi rin ang walong iba pa. (Gilbert Perdez)