MUKHA NG KATARUNGAN

Maraming usaping legal ang nagsulputan sa mga nakaraang linggo dahil sa mga salang galawan. Sa paglutang ng masasabing tuwirang saksi sa mga salang gawa, napilitang buksan ang mga pag-uusisa o imbestigasyon sa banggit na mga krimen, ang mga nawalang mga sabungero sa iba’t – ibang panig ng Luzon. Sa banggit na usapin, mababasa, mapapanood o mapapakingan ang bawat panig ng mga sangkot sa usapin ng mga nawawalang sabungero na naduhagi sa katarungan. Silip ang paglabas ng mga malalaking ngalan na pinararatangan utak o mastermind maging ang ngalan ng ilang malapit kaibigan na kilala sa pelikula.

Sa paglutang ng ngalan ng isang Atong Ang, walang sinayang na oras ang banggit na ngalan at nagharap o nagsampa ng kaso sa hapag ng husgado laban sa saksing naglabas ng pahayag hinggil sa mga nawawalang sabungero. Layong linisin ang ngalang nabahiran at ituwid ang anumang pahayag na nakasira sa ngalan bilang negosyante. Sa pagsampa ng usaping legal ni Ginoong Ang sa saksing dating kaibigan, inaasahan ang pagtagal ng usapin na ‘di batid kung matatapos o magkakasundo sa dulo ng usapin. O’ mawawala ang isa sa ngalan pagkakaibigan.

Sa paglutang ng usapin ng mga nawawalang sabunggero pansamantalang natabunan ang usapin ng pagpapasipa kay Inday Siba at pasalamat sa seksing senador na nagpahayag sa pagsabi na dalawang bagong senador ang napipintong sumama sa mayorya sa senado na nagpapanatili sa pwesto kay Keso. Pasalamat kay seksi dahil ang usapin ng katarungan ang himig na napapakinggan para sa naglahong sabungero’y may naka sosyo tenga ng bayan. Subalit, walang banggit si seksi sa kinahaharap na usapin na tinanggihan ng hukuman na ibasura sa inihaing tindig ng kampo nito. Ang pagharap sa sariling usaping legal ang hindi matatakasan ni seksi at sa nalalapit na panahon, ang pagbalik sa rehas ang muling mararanasan. Higit, silip ang kiling ni seksi sa usapin ng pagpapasipa kay Inday Siba.

Sa totoo lang, may katagalan ang usapin ng ilang mambabatas na nakabinbin sa mga hapag ng katarungan na ‘di umuusad. Nariyan ang usapin ng isang mambabatas na diskwalipikado na humawak ng anumang posisyon sa pamahalaan ang nahalal at nagawa pang manulsol sa kapwa mambabatas. Ok lang na husgahan, dahil maaaring takpan ng pwesto’t salapi ang katarungan. Ang katarungan na nasa harap ni Mang Juan na dapat sundin ay tila iba at ‘di naaangkop sa iilan.

Sa mga usaping banggit tila dalawa ang mukha ng katarungan, sa paghahain pa lang ng reklamo o usapin sa hukuman, hindi maitatago na kailangan ang de-kampanilyang abogado upang mabilis ang pagtanggap ng reklamo at may media na magdadala ng usapin na isyu ng bayan. Sa totoo lang, ang ngalan ng taong sangkot sa usapin ang ibig ipabatid sa bayan at pangalawa lang ang inihaing reklamo. Samantala sa kabilang banda ng mukha ng katarungan, maraming pasakalye o tsetse buretse sa harap ng kamera ngunit ‘di nasasampahan ng kaukulang kaso ang may sala. Magkaiba ang tanggap sa iisang bagay sa iisang hanap, katarungan. O’ tuwiran na nakapiring ang hustisya sa kawalan ng pantustos sa usapin.

Sa pagmamasid at pagtatasa, masasabing tama ang kilos o galaw na tinahak ng kasalukuyang pamahalaan na ipaubaya sa pandaigdigang hustisya ang pagdinig sa usapin na iniharap laban kay Totoy Osla. Sa totoo lang, ang makamtan ang tamang pag-uusig, tamang husga o hatol ang makakamit ng mga naduhagi ng katarungan sa bansa. Sa kabilang banda, hindi maisasantabi ang karapatan ng akusadong si Totoy Osla sa banggit na hapag lalo’t batid ang pagiging patas sa paghatol. Ang pagtangi sa kahilingan ng abogado ng akusado sa pansamantalang paglaya’y ayon sa malalim na dahilan, ang kaligtasan ng mga kamag-anak ng biktima at kagalingan ng bawat panig.

Sa kabilang banda, sa pagkakataong dininig ang usapin ni Totoy Osla sa anumang hapag ng husgado sa bansa, masisiguro na mapawalang sala o ‘di tamang hatol ang magagawad higit kung ang mga didinig sa usapin ay ang itinalaga sa pwesto ng dating pangulo. At ang umiwas sa usapin ang mga tagapagtanggol na masasangkot sa usapin ang masisilip na dahilan sa mabilis na hatol na maigagawad. O’ sa isang banda, ang maubos ang mga tumayong saksi laban sa naakusahan na batid na walang puso sa sino mang kalaban sa layon.

Sa usapin ni Inday Siba, silip ang keso ng bugok na kapulungan na didinig sa pagpapasipa ang pagkiling sa panig ng uusigin. Hindi o wala ang magaganap na pagdinig sa inihaing kaso na nasa harap ng bugok na kapulungan. At ang pagbalam na gawa sa pagdinig ang natunghayan ni Mang Juan na umusal na “justice delay justice deny” ang nakamtan ng bayan na naghahanap ng kaliwanagan sa salang gawa ng abalang pangulo. Walang ibang hanap si Mang Juan at ang bayan kung hindi ang maipaliwanag ang salang gawa na nasilip sa usapin ng malawak na kapulungan. Ang pagbibigay puwang na ipaliwanag ang nabatid na sala ang tamang bigyan pansin ng luminaw ang malabo at malinis ang ngalan.

Ang doble karang mukha ng usaping pangkatarungan ang inaasahang maglalaho sa kasalukuyang pamahalaan. Umaasa na ang ‘di naririnig na panig dahil sa kawalan ng pantustos o kahirapan ng sino mang humaharap sa usaping katarungan ay bangungot na lang sa nakaraan. Muli, umaasa, sa liderato ni Jun Singhot, na ‘di magaganap ang kawalang katarungan higit ng mga tao sa laylayan na parang labuyo ang ilap ng katarungan na ‘di malapitan kahit ‘di binubugaw. Muli, ang patas na katarungan ang inaasahan na paiiralin sa mga hukuman at isusulong ng pamahalaan.

Maraming Salamat po!!!!