DINA BONNEVIE BALIK HOSTING, MGA ANAK AT MANUGANG CO-HOSTS AT CO-PRODUCERS

Ni ROMMEL GONZALES

NAGSIMULA na ang online show ni Dina Bonnevie na House of D sa YouTube.

Co-hosts at co-producers niya ang mga anak niyang sina Danica at Oyo Sotto at mga manugang na sina Marc Pingris na mister ni Danica at Kristine Hermosa na misis ni Oyo.

Sikat dati ang Ms. D! na talk show niya na umere mula November 1996-February 1999.

“Noong una naisip ko, ako lang.

“But then, naisip ko, DV would always say, ‘Why don’t you have a talk show with Danica and with Tin? Tutal, gustung-gusto naman ni Danica na magkaroon ng talk show.'”

Si DV ay si Deogracias Victor Savellano na mister ni Dina na yumao noong January 7, 2025.

“And a lot of people were asking, ‘Bakit hindi kayong tatlo ni Tin?’

“Tapos naisip ko, ‘Hihindi naman si Tin. Hindi naman siguro papayag yan.’ So siguro, kami na lang dalawa ni Danica.

“Then one time, we were together, I brought the topic sa kanila. Tapos nagulat ako, ‘Maganda yan, Ma! Gawin natin!’ So doon ko naisip na gusto nila.”

Bago ang talk show ay nag-iisip daw si Oyo na magtayo ng negosyo kasama si Kristine.

“Noong time rin na yun sinabi ni Oyo na he wanted to invest their money. Kasi, meron daw silang extra money ni Tin and he wanted to invest sa production company ng dad niya.”

Si Vic Sotto na ama nina Oyo at Danica ay co-producer ng Eat Bulaga! sa TV5 at may sarili ring production company na M-ZET Productions na nagproprodyus ng mga pelikula at TV shows.

“And then sabi ng dad niya, ‘Wag na lang ngayon. Ganyan-ganyan.’

“Tapos, sabi pa ng daddy niya, ‘Kung gusto mo, i-advance ko sa yo ang inheritance mo.’ Sabi niya, ‘No, it’s not that, Dad. I want to learn to have my own company.'”

Kaya naisip ni Dina na mag-co-produce si Oyo sa kanyang online show.

“Naisip ko, tutal naman my son would like to venture at gusto niyang mag-invest sa dad niya…

“Pero siguro naman si Vic, bilang protective of his son, takot din siya na baka malugi ang pera ng anak niya. Kasi nga, bago pa lang ang show [kaya sinabi niya] ‘Wag na muna anak.'”

Si Oyo rin ang director ng online show ni Dina.

“Sabi ko, ‘Oyo, ba’t kaya hindi ka mag-direk? Di ba, dream mo naman dati pa na mag-direk? At every time na may soap ka naman, nakikialam sa direksyon.’

“Sabi niya, ‘Puwede, pero, gusto ko munang mag-train ng konti.’

“Pero sabi ko, ‘You have the touch.’ Sabi niya, ‘Alam ko kaya ko. Pero give me the chance to gather muna.’ And nagustuhan niya. And I can see how responsible he is.”

Si Danica naman ay naiisip ni Dina na puwede naman niyang maging co-host.

“Sabi ko, gusto ni Danica na mag-talk show. Gusto rin naman ni Oyo na mag-direk.

“So, why not give both my children a chance?

“Kapag kasama ko naman ang dalawa kong anak, the in-laws will follow.

“So, we asked Marc kung gusto niyang sumali, go naman siya.

“Although Marc said that I will not always be there kasi marami siyang laro abroad or laro out-of-town. So, given na yun na there will be episodes na wala si Marc.

”Ang surprise sa amin ay si Tin that she wanted to do it.
“Sabi niya, ‘This is one thing that I can do na hindi ako malalayo sa mga anak ko. Hindi naman ‘to taping na magdamag, maghapon. So, why not? Sige, gusto ko.’

“And then she said na yun nga, I’ve been looking for a venue to be able to bring people to God. To be able to bring people to the Lord through my experiences.

“Magugulat ka na may mga experiences pala siya na hindi namin alam. So, nasi-share niya naman.

“We don’t want to be a nonsense show naman.

“We want people to pick up something. Even in our funny episodes, sasabihin namin na para bang, why people are happy, why we are doing this.

 

“Ang message ng show namin, sa katatawanan, sa lungkot, sa hirap, sa pag-ibig, nandiyan ang pamilya mo.

“Sa lahat ng gagawin mo, the core is always family.

“And in my personal experience na there were times na naging malungkot din ang mga anak ko because of my wrong decisions.

“There were times na nadamay ang mga anak ko dahil sa mga mali kong desisyon sa buhay.”

Sa puntong ito, naging emosyunal at umiyak si Dina.

“But through thick or thin, through high or low water they were always there to stand by me, never judge me, never disrespected me.

“Through thick or thin, family was there, hindi nila ko iniwan. Inintindi nila ko sa lahat ng bagay.

“Kaya ako, magkamali man sila, I tell them also na mali man ang desisyon mo diyan, I never judged, iniintindi ko rin. Kasi yun ang family, e.

“Family shouldn’t judge you. Family should support you. Family should be your core.

Katuwang ni Dina sa pagbuo ng programa ang matalik niyang kaibigan, ang character actress na si Shyr Valdez at ang abogado nila na si Atty. Mark Julius Estur at si Rams David ng Artist Circle management.

Mapapanood ang House Of D anytime sa House of D official YouTube channel.