Mahigit 3,000 OFWs at Pamilya dumalo sa 14th OFW and Family Summit

Mahigit 3,000 na mga overseas Filipino workers (OFWs) at kanilang mga pamilya ang nagtipon sa The Tent, sa Villar City, noong Nobyembre 14, para sa ika-14 na OFW and Family Summit, isang taunang kaganapan na inorganisa ng Villar Foundation upang parangalan at palakasin ang kakayahan ng mga Pilipinong manggagawang migrante.

Pinangunahan ang summit ng pamilya Villar- dating Senate President Manny Villar, dating Senador Cynthia Villar, at mga Senador na sina Mark at Camille Villar, pati na rin si Vistaland President Paolo Villar, na nagbigay ng mainit na pagtanggap sa mga kalahok at muling pinagtibay ang kanilang matagal nang pangako na suportahan ang kapakanan at aspirasyon ng mga OFW at ng kanilang mga mahal sa buhay.

Sa kanyang talumpati, nagpasalamat si dating Senate President Manny Villar sa mga OFW, at inalala kung paano nagsimula ang kanilang negosyo sa pabahay sa pamamagitan ng isang seafarer bilang kanilang unang kliyente. “Utang na loob po natin sa mga OFW ang ating kabuhayan,” ani niya.

“Ang ika-14 na Summit na ito ay magandang paalala na patuloy lang ang ating trabaho para sa ating mga bagong bayani,” sabi ni Senador Mark Villar, na muling ipinahayag ang kanyang suporta sa mga manggagawang migrant sa pamamagitan ng mga batas gaya ng Left Behind Household of Migrant Workers Act, OFW Hospital Act, at OFW Financial Literacy Enhancement Act.

Samantala, muling pinagtibay ni Senadora Camille Villar ang kanyang pangako na itaguyod ang mga polisiya na nagpoprotekta at nagpapalago sa kapakanan at interes ng mga OFW at kanilang pamilya.

Itinampok sa summit ngayong taon ang mga serye ng talakayan, panel discussions, at interactive booths na nakatuon sa financial literacy,entrepreneurship, reintegration programs, at suporta ng gobyerno para sa mga manggagawang migrant. Ang mga katuwang na ahensya-kabilang ang DMW, OWWA, DOJ, TESDA, Pag-IBIG Fund, DTI, at iba’t ibang pribadong kumpanya-ay nagbigay ng on-site consultations at tulong.

Dumalo rin sa Summit si Department of Migrant Workers Secretary Hans Leo Cacdac, na ipinakita ang kanyang patuloy na suporta at regular na pakikilahok sa Summit.

Naglaan din ang okasyon ng pagkakataon para sa mga kalahok na maipahayag ang kanilang saloobin, alalahanin, at suhestiyon nang direkta sa mga kalahok na ahensya ng gobyerno-nagbibigay sa mga OFW at kanilang pamilya ng pagkakataong marinig at makipag-ugnayan nang makahulugan sa mga opisyal na maaaring tumugon sa kanilang pangangailangan.

Isang pangunahing tampok ng kaganapan ang raffle draws, kung saan nagkaroon ang mga kalahok ng pagkakataong manalo ng mga home appliances, pangkabuhayan packages, at motorsiklo. Ang pinakaaabangang premyo-isang bagong Camella house and lot, ay iginawad kay Margarita Calsado mula sa Las Piñas, isang OFW sa Oman sa loob ng 14 na taon, na may luha sa mata na nagpasalamat habang natupad ang matagal na niyang pangarap na magkaroon ng sariling bahay.

Patuloy na nagbibigay ang summit ng isang komprehensibong plataporma para sa mga overseas Filipino workers (OFWs) na naghahanap ng gabay, suporta, at mga paraan patungo sa pinansyal na katatagan at reintegration. Sa ika-14 nitong taon, binibigyang-diin ng kaganapan ang matagal nang pangako ng pamilya Villar na itaguyod ang kabuhayan ng mga Pilipinong manggagawang migrante at palakasin ang ugnayan ng mga pamilya ng OFW sa bawat henerasyon.