COMELEC, DI MUNA MAGI-ISYU NG VOTER CERTIFICATIONS

INIHAYAG ng Commission on Elections (Comelec) na hindi muna mag-iisyu ng voter certification ang kanilang punong tanggapan sa Intramuros, Manila.

Ayon kay Comelec Chairman George Garcia, ito ay bunsod nang isinasagawang maintenance sa server ng Data Center Automated Fingerprint Identification System (AFIS) ng Information Technology Department ng ahensiya.

Inanunsiyo ng Comelec sa kanilang Facebook page na ang suspensiyon ay epektibo nitong Disyembre 3 at magtatagal, ‘until further notice.’

“The issuance of Voter Certification at the COMELEC-National Central File Division (NCFD), FEMII Building, Extension Cabildo Street cor. A. Soriano Avenue, Intramuros, Manila is TEMPORARILY SUSPENDED, effective 3 December 2025 (Wednesday), until further notice, due to maintenance of the Data Center AFIS [Automated Fingerprint Identification System] Server at the Information Technology Department of this Commission,” ayon pa sa abiso ng Comelec.

Samantala, pinayuhan ni Garcia ang publiko na kumuha muna ng kanilang voter certification sa office of the election (OEO) officer sa kanilang munisipalidad o lungsod, kung saan sila nakarehistro bilang botante. (JERRY S. TAN)