“PILIPINO TAYO!” SIGAW NI IMELDA PAPIN

Ni Rommel Gonzales

Puno ng damdamin, suporta,pagkakaisa at pambansang pagmamalaki ang Tanghalang Pasigueño sa grand launching ng anthem na “PILIPINO TAYO,” nitong Disyembre 8, kunsaan dumagsa ang mga Pilipino mula sa iba’t ibang antas ng pamumuhay — anuman ang kulay pulitika o pinagmulan, upang ipagdiwang ang isang kantang nagbubuklod sa lahat.

Inawit ng kilalang mang-aawit at iconic singer / OPM legend na Ms. Imelda Papin ang kanta, na nilikha nina Mon del Rosario at Imelda Papin, at agad na tumimo sa puso ng mga dumalo.

Sa pagbukas ng anthem:

“Pilipino Ako, Pilipino Tayo… Oh! Pilipino Tayo…”

Ramdam agad ang pagmamahal sa bayan at pagkakakilanlan bilang Pilipino. Patuloy ang emosyon sa kanyang pagtatanghal:

“Ako ay Pilipino, malalim kung magmahal… hindi tumatalikod sa krusada ng kapayapaan… Sa aking mga magulang ako ay magalang…”

Ang pre-chorus na “Kahit labi ko ay may ngiti, kahit tinig ko ay may lambing…” ay nagdulot ng katahimikan sa auditorium bago pumutok sa palakpakan sa chorus:

“Di mo mabibili, bakal ang paninindigan… Pilipino Ako!”

Marami sa mga dumalo ang naantig at nakaramdam ng nostalgia, naalala ang mga alaala ng kabataan, pamilya, at mga pinapahalagahan nating tradisyon.

Sa kanyang mensahe, sinabi ni Imelda Papin: “Ang kantang ito ay paalala na saan man tayo dalhin ng buhay, iisa pa rin tayong sambayanan — matatag, nagmamahalan, at nagkakaisa. ‘PILIPINO TAYO’ ay alay ko sa bawat Pilipinong patuloy na lumalaban para sa ating bayan.”

Masigla rin ang suporta mula sa maraming media, press, at mga vlogger, na nagbahagi ng kaganapan sa mas malawak na madla.

Ayon sa mga organizer, higit pa sa isang kanta ang “PILIPINO TAYO” — ito ay paanyaya sa pagkakaisa, pagmamalaki, at pagmamahal sa Pilipinas.

Inaanyayahan ang bawat Pilipino na makiisa, umawit, at ipagmalaki: “PILIPINO TAYO.”