MGA KAPAMPANGAN, NAKATANGGAP NG BIGAS, SCHOLARSHIP AT AYUDA SA ILALIM NG MGA PROGRAMA NI PANGULONG MARCOS

SINASABING ang tunay na sukatan ng isang pamahalaan ay kung paano nito naipaparamdam sa ordinaryong mamamayan na hindi sila napapabayaan.

Sa gitna ng patuloy na hamon ng mataas na presyo ng bilihin at kakulangan sa oportunidad, malaking bagay ang anumang programang direktang nakatutulong sa pang-araw-araw na pangangailangan ng mga Pilipino.

Kaya naman naging makahulugan para sa maraming Kapampangan ang pagtanggap nila ng bigas, scholarship, at iba’t ibang ayuda sa ilalim ng mga programang isinusulong ng administrasyon ni Pangulong Ferdinand Marcos Jr. Hindi lamang ito basta pamimigay ng tulong kundi pagpapakita rin ng malasakit ng pamahalaan sa kalagayan ng mamamayan.

Malaking ginhawa para sa mga pamilya ang pagkakaloob ng bigas lalo na ngayong patuloy na tumataas ang presyo ng mga pangunahing bilihin. Para sa maraming mahihirap na pamilya, kahit ilang kilong bigas ay malaking tulong na upang may maihain sa hapag-kainan araw-araw.

Mahalaga rin ang layunin ng Bagong Pilipinas Rice Program na tiyaking walang Pilipinong magugutom. Isa itong simpleng pangarap ngunit napakalaking hamon na nangangailangan ng tuluy-tuloy na aksyon mula sa gobyerno at pakikipagtulungan ng iba’t ibang sektor.

Kapuri-puri rin na ang mga ipinamimigay na bigas ay direktang binibili mula sa mga magsasaka ng Pampanga. Sa ganitong paraan, hindi lamang mga benepisyaryo ang natutulungan kundi maging ang mga magsasakang matagal nang naghihintay ng sapat na suporta mula sa gobyerno.

Sa sektor naman ng edukasyon, napakahalaga ng tulong-pinansyal para sa mga estudyanteng kapos sa buhay. Maraming kabataan ang nangangarap makatapos ngunit nahahadlangan dahil sa kakulangan sa pera para sa matrikula, proyekto, at iba pang gastusin sa paaralan.

Ang scholarship assistance na ipinagkakaloob sa mga graduating students ay malaking hakbang upang mabigyan sila ng pag-asang makamit ang kanilang mga pangarap. Hindi man nito tuluyang masolusyunan ang kahirapan, nagsisilbi naman itong tulay upang magkaroon sila ng mas magandang kinabukasan.

Tama rin ang naging pahayag ng Pangulo hinggil sa kahalagahan ng edukasyon. Ang kaalaman ay kayamanang hindi mananakaw at mananatili habang-buhay. Ito ang isa sa pinakamabisang paraan upang makaahon ang isang tao at pamilya mula sa kahirapan.

Mahalagang punto rin ang pagbibigay ng pondo sa mga barangay para sa mga proyektong pangkomunidad. Kapag may sapat na kagamitan, maayos na ilaw sa kalsada, at maayos na disaster preparedness, mas nagiging ligtas at organisado ang mga komunidad.

Sa totoo lang, ipinapakita rin ng mga ganitong programang ang kahalagahan ng maayos na ugnayan ng national at local government.

Gayunman, mahalaga ring matiyak na magiging tuluy-tuloy at maayos ang implementasyon ng mga programang ito. Kailangang masigurong tunay na nakararating ang ayuda sa mga nangangailangan at hindi nasasayang ang pondo ng bayan.

Sabi nga, ang pinakamahalagang bunga ng mga ganitong programa ay ang pag-asang naibibigay nito sa mamamayan.

Kapag nararamdaman ng tao na may gobyernong handang tumulong at makinig, mas lumalakas ang kanilang loob na magsikap at mangarap para sa mas maayos na bukas.

***

Catch Gilbert Perdez on “IZ Balita Nationwide” over DWIZ 882 AM and ALIW Channel 23 every Saturday from 6:00 AM to 7:00 AM. Tune in via ALIW Channel 23, DWIZ AM Radio, the DWIZ 882 Facebook page, or DWIZ On-Demand on YouTube. You can contact him via email at gil.playwright@gmail.com or at 0991-354-3676.