PUMANAW NA KAHUSAYAN

Maraming panahon ang lumipas ‘di nakuhang kumupas ang senadong pinakikinggan ng bayan na sa panahong kasalukuyan tila naubusan ang kapulungan ng kagalingan. Lumipas ang panahon, muling masasabak ang pinagpipitaganang kapulungan sa gaganapin o ginaganap na pagdinig sa pagpapasipa sa opisyal na kinasuhan sa salang gawa. Sa takbo ng mga araw sa ginaganap na pagdinig ang dating kinagigiliwan kapulungan, silip ang kawalan ng kinang ng mga senador na tumatayong bilang mga hukom sa paglilitis na nasa kanilang harapan. Sa uri ng pagtatanong na ibinabato ng mga hukom-senador sa testigo, tila mula sa kawalan na ‘di mabatid ang ibig makuha sa ipinupukol na tanong saki. At pasalamat sa abogado na tagapagtanggol sa pag-ayuda na maibaon ang inaakusahan sa galawang ‘di inaasahan, ginamit ang videong unang tinutulan sa pagbibigay diin sa puntong ibig patunayan o patunguhan.

Walang balak himayin ang kagalingan ng mga nagtatalastasan o ng magkabilang panig sa pagdinig at ang natuunan ang alang kagalingan ng mga hukom-senador na ‘di mabatid ang tindig, kaliwa ba kanan o diretso. At pumapasok sa isip kung nagkaroon o binigyan ng pagsasanay sa galawan sa sa loob ng hukuman ng mga tatayong hukom-senador sa proseso o kung sa tindig na walang bakas ng pagkiling. Subalit, sa takbo ng galawan, silip ang pagkiling ng mga kinatawan sa uri ng pagtatanong sa testigo na nasa harapan. Ganap na may linyang politika ang pagdinig subalit sa tulad ng mga karaniwang tao, nababasa ang pagkiling na ‘di na kailangang sabihin kung saan. Sa kabilang banda, nakakahiyang ikumpara ang isang dating Sen. Ambrosio Padilla sa bata ni Batman sa uri ng pagtatanong sa saksi na ibinabato. Malaman ang tanong ng bata ni Batman na may pagkahalintulad sa tv show na Kakasa ka ba sa Grade V, hehehe.

Sa kasaysayan sa banggit na kapulungan, hindi maiaalis ang husay ng mga hukom-senador na ‘di maisantabi ng mga bisita higit sa usapin ng kaayusan sa hukuman. Hindi magawang makipagtalo o masabihan ng mga bisita ang mga hukom sa galawan na ganap ang pagbihasa sa kaayusan sa hukuman. Sino ang makikipagtalo sa isang MDS, JPE, iba pang mahuhusay na senador at maging ang naging punong tagapagpaganap sa pnahon ng pagpapasipa kay Erap, si Punong Mahistradong HD. Hindi minamaliit ang kasalukuyang mga hukom-senador ngunit malayo ang galing na may pagbabatayan na banggit. Nakakalungkot na mamasdan ang uri ng mga hukom-senador na may kaba at andap sa tamang pagtatanong sa usaping nasa harap at mabalikan upang itama ng nakakabatid sa takbo o regla sa hukuman.

Sa isang pagkakataon sa kasalukuyang pagdinig, silip ang pagtutuwid ng tagapagpaganap sa ilang hukom-senador na tila patungo ang pagtatanong sa pagtatapos ng usaping nakasalang. Hindi mali ang tanong ngunit sala sa tamang panahon. Napansin o nasilip na ang tanong ng hukom-senador na may kahinaan higit nasa unang yugto ng pagdinig ang usapin. Ang masakit, nakita ng iyaking walang luhang hukom-senadora ang pagkakataon na kastiguhin ang kahinaan ng tanong ng senadora-hukom na ‘di abogado. Umusal ng maraming patutsada ang iyaking hukom-senador na tila nagmamagaling at ibig ipahiya sa madla ang kinaiinisang kasama. Samantala, humahanga ang Batingaw sa butihing hukom-senadora sa tindig para sa katotohanan maging sino man ang nakasalang sa usapin. Walang pagbabalatkayo na ang layon sa pagtatanong ay mapalabas ang katotohanan para sa kagalingan ng bayan, maging ng nasasakdal. Walang pagkiling at muli, pawang katotohanan ang ibig makita ng butihing hukom-senadora.

Sa karaniwang mamamayan, inuugatan ang kaalaman na nasilip sa nakaraan sa ‘di maayos ang galawan sa kasalukuyan sa kapulungan o tanggapan ng hukom-senado. Ang kawalan ng malalim na pag-unawa sa galawan sa hukuman ang ‘di namamalas sa kasalukuyang pagdinig. Maging ang ilang nag-aral ng batas, silip na ‘di gumagalaw sa takdang asal sa loob ng hukuman. O’ sadyang ‘di ibig sumunod sa tuntunin sa rason ng galawang kampihan sa politika at ‘di kagalingang liderato sa kapulungan. Ang mga pasaring na tungo sa panlilibak sa talastasan ng mga magkatunggali ang silip na salang galaw ng mga hukom-senador na may pagkiling. Hindi inaalis ang kampihan ngunit ang makita ang tamang asal sa loob ng hukuman ang inaasahan. At sa ngalan ng hustisya para sa bayan, ang katotohanan ang ibig manaig sa dulo ng pagdinig. Ito ba’y maaasahan sa mga hukom-senador?

Ang malamyang pagpapakita ng kagalingan ng mga hukom-senador ang larawan na ‘di ibig magtuloy tuloy higit sa mga darating na panahon. Ang pagkakaroon ng mga kalidad na kandidatong tatakbo sa mga susunod na halalan ang inaasahang magaganap. Sa kung may mga mabibigat na pagkamarapat sa mga upuan sa pamahalaan, ang taasan ang pagkamarapat sa pwestong ihahalal ang ibig maganap sa pamahalaan. Hindi sapat nasa tamang edad, ang pagiging Pilipino, makapagbabasa at makapagsusulat ang pagkamarapat ang kailangan para sa pwestong ibig. Ang maging sapat ang kakayanan higit sa mga galawang may mahalagang pagpapasya ang nais maganap sa pamahalaan. Ayusin ang puntong banggit na napapanahon higit sa galawan na ‘di lang sa bansa napapanood ang usapin ng pagpapasipa sa abalang pangulo, maging sa ibang bansa. Isulong ang bayan patungo sa makalidad na lider sa bansa.

Ang hindi kaaya-ayang at hungkag na kaalaman ng mga hukom-senador, umaasa na ‘di aabot sa salang paghusga sa dulo ng pagdinig. Umaasa na magkakaroon ng katinuan sa pag-iisip ang bawat hukom-senador sa dulo ng pagdinig na pananaigin ang tama at ‘di mali sino man ang tamaan. Sa pagtatapos ibig na magkaroon ng pagbabago sa bansa tungo sa pag-unlad. Ang nagaganap sa kapulungan ng senado’y ‘di lang namamasdan sa bansa ito’y napapanood ng ibang lahi. Ang tamang hatol ang inaasahan na magbibigay sa bansa, sa bawat Pinoy ng karangalan na bumabaling sa tama at winawaksi ang mali ng mga hukom-senador.

Maraming salamat po!!!!